Elimizde qansha aýylda ınternet joq

NUR-SULTAN. QazAqparat – Elimizde 1 myńnan astam eldi meken turǵyndary ınternetke qol jetkize almaı otyr. Ulttyq kommýnıkatsııalar jáne tsıfrlandyrý qaýymdastyǵynyń vıtse-prezıdenti Janat Asantaeva osylaı deıdi, dep habarlaıdy QazAqparat tilshisi.

«Reıtıngterge qaramastan Qazaqstan halqy sapaly ári jyldamdyǵy joǵary ınternetke qol jetkizýde qıyndyqtarǵa tap bolyp otyr. Tipti keı jerlerde ony qoldaný múmkindigi de joq. Memlekettik organdardyń málimetine qaraǵanda 2020 jyly talshyqty-optıkalyq baılanys pen ınternetke mobıldy qoljetimdilikti qamtamasyz etetin jeli qurylysyn salý jobasy aıaqtalyp, 5 532 eldi meken qamtyldy. Halyqaralyq tájirıbeni eskere otyryp, buǵan deıin qoldanysta bolǵan «Tsıfrly Qazaqstan» memlekettik baǵdarlamasy aıasynda talshyqty-optıkalyq baılanys jelisi eń iri eldi mekenderge jetkizildi. Eldi mekenderde avtonentterge deıin baılanys jetkizý mobıldi tehnologııalar arqyly júzege asyrylady, - dedi ol telekommýnıkatsııa naryǵyn demonopolızatsııalaý máselelerin talqylaýǵa arnalǵan Menmedia.kz kross-medıaplatformasy barysynda.

Onyń atap ótýinshe, árbir operator tehnıkalyq múmkinshilikterge qaraı mobıldi tehnologııalardy ózderi tańdaıdy.

«Ótken jyldyń qarasynda Májilis depýtattary bıznestiń elektrondy esep berýge tolyq kóshýin kózdeıtin jańa retteýshilik saıasatqa qatysty másele kóterdi. Biraq, 1 178 aýylda ınternettiń joq ekendigin anyqtalyp otyr. Munyń ústinde aýyl turmaq qalalardyń ózinde keı jerlerde baılanys álsiz. Adamdar kóp jınalatyn jerde de júktemeniń artýyna oraı baılanys turaqty emes. Depýtattardyń paıymynsha, elektrondy esep berýdi mindetteıtin norma qabyldanǵan jaǵdaıda elimiz boıynsha myńdaǵan kásipker qıyndyqqa tap bolar edi», - dedi ol.