Elimizde qaldyqtardy óńdeý úlesi artty ma

ASTANA. QazAqparat - Qazaqstanda turmystyq qatty qaldyqtardy qaıta óńdeý úlesi aıtarlyqtaı ósti. Bul týraly «Nur Otan» partııasynda turmystyq qatty qaldyqtardy kádege jaratý taqyrybyna arnalǵan dóńgelek ústel otyrysynda QR Energetıka birinshi vıtse-mınıstri Mahambet Dosmuhambetov málim etti, dep habarlaıdy QazAqparat.

«2017 jyly 737,2 mln tonna ónerkásiptik qaldyqtardyń 227,9 mln tonnasy paıdaǵa asyryldy jáne qaıta óńdeldi. Bul kórsetkish 30,9 paıyzdy qurap otyr. Árıne, bul úlken kórsetkish emes, alaıda onyń aldyndaǵy jylmen salystyrǵanda ońtaıly úrdis bar. ıAǵnı 2016 jyly osy kórsetkish 26,8 paıyz deńgeıinde tirkelgen edi. 4,8 mln tonna turmystyq qatty qaldyqtardyń 440 myń tonnasy qaıta óńdelip, paıdaǵa jaratyldy. Osy baǵyttaǵy kórsetkish 9 paıyz boldy. Degenmen de aıtarlyqtaı ósim bar, sebebi 2016 jyly onyń deńgeıi tek 2,6 paıyzdy quraǵan bolatyn», - dedi Mahambet Dosmuhambetov.

Onyń sózine qaraǵanda, búginde qaldyqtardy jınaý men shyǵarý qyzmetimen halyqtyń 69 paıyzy qamtyldy. 2016 jyly bul kórsetkish 64 paıyz bolǵan.

«Ekologııalyq talaptar men sanıtarlyq normalarǵa sáıkes keletin polıgondar úlesi 16 paıyzǵa jetti. 2016 jyly onyń deńgeıi 15 paıyzdy quraǵan edi», - dep naqtylady ol.

Birinshi vıtse-mınıstrdiń atap ótýinshe, qaldyqtarmen jumys isteıtin kásiporyndar úshin memlekettik qoldaýdyń sharalary iske qosylǵan. Osy oraıda mınıstrlik usynysy boıynsha qaldyqtardy jınaý, joıý jáne paıdaǵa asyrý qyzmeti ekonomıkanyń basymdyqty sektorlary tizimine engizildi. Bul óz kezeginde «Bıznestiń jol kartasy-2020» baǵdarlamasy aıasynda kásiporyndarǵa uzaqmerzimdi lızıngtik qarjylandyrýdy alýǵa múmkindik beredi.