Elimizde qalalyq ózin-ózi basqarý keńesi qurylady

ASTANA. QazAqparat – Qazaqstanda aýmaǵynda qalalyq ózin-ózi basqarý keńesteri qurylady. Bul týraly Májiliste «Qazaqstandaǵy jergilikti ózin-ózi basqarý týraly» zań jobasyn tanystyrý kezinde Ulttyq ekonomıka vıtse-mınıstri Baýyrjan Omarbekov aıtty, dep habarlaıdy QazAqparat tilshisi.

«Úkimettik emes uıymdar qalalarda jergilikti ózin-ózi basqarý damymaǵan degen syn aıtyp jatyr. Osy oraıda, elorda, respýblıkalyq jáne oblystyq mańyzy bar qalalar deńgeıinde jergilikti ózin-ózi basqarý organy – qalalyq ózin-ózi basqarý keńesi qurylady. Onyń ókilettik merzimi tórt jyl bolady», - dedi B. Omarbekov.

Onyń aıtýynsha, qalalyq ózin-ózi basqarý keńesin qalyptastyrý úshin respýblıkalyq mańyzy bar qalanyń, astananyń jáne oblystyq mańyzy bar qalanyń aýmaǵy okrýgterge, al okrýgter ýchaskelerge bólinedi. Okrýgter men ýchaskelerdiń shekaralaryn tıisti jergilikti máslıhat aıqyndaıdy.

Ár ýchaskeniń aýmaǵyndaǵy turǵyndarynyń ishinen qalalyq ózin-ózi basqarýdyń okrýgtik keńes quramyna kiretin jáne tıisti ýchaske turǵyndarynyń múddelerin bildiretin ókilder saılanady. Qalalyq ózin-ózi basqarý keńesiniń quramy okrýg músheleriniń qatarynan, ıaǵnı bir okrýgten bir ókildi saılaý tárbimen qurylady.

Qalalyq ózin-ózi basqarý keńesi músheleriniń qyzmeti qoǵamdyq negizde júzege asyrylady.

«Óz kezeginde, qalalyq ózin-ózi basqarý keńesi óz quzyreti aıasynda hattama túrinde resimdeletin sheshimder qabyldaıdy, jergilikti memlekettik basqarý organdaryna jáne tıisti máslıhatqa joldaıdy», - dedi vedomstvo ókili.

Zań jobasynda qalalyq ózin-ózi basqarý keńesiniń jáne onyń músheleriniń kelesi mindetteri qarastyrylǵan:

1) jergilikti qoǵamdastyqtyń basym mindetterin jáne olardy iske asyrý merzimderin aıqyndaý;

2) jergilikti mańyzy bar máseleler boıynsha jergilikti ókildi jáne atqarýshy organdarmen, múlik ıeleri birlestiginiń ári kóppáterli turǵyn úılerdiń qarapaıym seriktestikteriniń ókilderimen ózara is-qımyl jasaý;

3) azamattardy turǵyn úıler men úı mańyndaǵy aýmaqtardy kútip ustaý, paıdalanylýyn, jóndelýin, abattandyrylýyn jaqsartý máselelerin sheshýge tartý;

4) jer komıssııasynyń quramyna qatysý.

Budan buryn habarlanǵandaı, búgin Májiliste tanystyrylǵan zań jobasy aıasynda Qazaqstanda aýyldyq okrýg keńesterin qurý josparlanyp otyr.

Budan bólek, aýyl ákimi men onyń apparatyna qosymsha fýnktsııalar berilmek.