Elimizde hımııalyq qaýipti nysandardyń sany azaıady

ASTANA. QazAqparat – Qazaqstanda hımııalyq qaýipti nysandardyń sanyn azaıtý boıynsha keshendi sharalar qolǵa alynyp jatyr. Bul týraly TJM Azamattyq qorǵanys komıtetiniń tóraǵasy, polkovnık Baýyrjan Syzdyqov málim etti, dep habarlaıdy QazAqparat tilshisi.

«Búginde respýblıka boıynsha bizdiń esepte turǵan 142 hımııalyq qaýipti nysan bar. Qazir olardyń sanyn azaıtý boıynsha keshendi shara atqarylyp jatyr. Bastysy – halyq qaýipsizdigi úshin hımııalyq qaýipti nysandardy reagentterge kóshirý máselesi. Qazaqstandyqtar jıi qoldanatyn hımııalyq ýly zattar – hlor jáne ammıak. Ótken jyldyń qorytyndysy boıynsha elimizde úsh hımııalyq qaýipti nysan qaýipsiz reagentke kóshirildi. Endi atalǵan nysandar hımııalyq turǵydan qaýipsiz», - dedi Baýyrjan Syzdyqov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, hımııalyq qaýip tóngen jaǵdaıda halyq evakýatsııalanýy múmkin.

«Eger hımııalyq nysanda apat bolyp, dabyl qaǵylsa, halyq ol mańnan ketýi kerek. Hlor ne ammıak tógilgen jaǵdaıda, ol jerden aýlaq bolǵan jón. Taǵy bir jaıt, ýly zattarmen jumys isteıtin jáne sol mańda turatyn halyq úshin jergilikti atqarýshy organdar gazqaǵar (protıvogaz) satyp alady», - deıdi ol.