Elimizde gaz tutyný kólemi artty: Úkimet jańa ken oryndaryn ıgerýdi bastamaq

ASTANA. QazAqparat - Úkimette QR Premer-Mınıstri Álıhan Smaıylovtyń tóraǵalyǵymen ótken keńeste ishki naryqtyń qajettiligin tolyq qamtamasyz etý úshin suıytylǵan munaı gazyn óndirýdi ulǵaıtý sharalary qaraldy.

Bul týraly QazAqparat Úkimettiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, jıynda elimizde gaz tutyný kólemi jyl saıyn artyp kele jatqany, atap aıtqanda, ótken jyldyń qorytyndysyna sáıkes bul kórsetkish 1,8 mln tonnany quraǵany aıtyldy.

Bul kólemniń 65%-ǵa jýyǵy avtokólikterge, 25%-y ónerkásip kásiporyndaryna, 10%-y halyqtyń qajettilikterine jáne basqa da salalarǵa jumsaldy.

2023 jylǵy boljamdy gaz tutyný kólemi 1,9 mln tonnany quraıdy.

Artyp kele jatqan qajettilikterdi óteý úshin birqatar keleshegi bar jańa ken oryndary ıgerile bastaıdy. Olardan alǵashqy óndirilgen gazdy osy jyldyń sońyna deıin alý josparlanyp otyr.

Premer-Mınıstr janar-jaǵarmaı naryǵyndaǵy jaǵdaıdy udaıy baqylaýdyń jáne azamattardy, ónerkásip kásiporyndary men áleýmettik mekemelerdi úzdiksiz qamtamasyz etý úshin josparlanǵan jobalardy ýaqtyly iske asyrýdyń mańyzdy ekenin atap ótti.