Elimizde gaz baǵasyn tejep ustaý mehanızmi engizilmek
17:28, 01 Aqpan 2023
ASTANA. QazAqparat – Gaz salasyn damytýdyń 2026 jylǵa deıingi keshendi jospary aıasynda gaz baǵasyn áleýmettiń osal toptary úshin tejep ustaý mehanızmi engizilmek, dep habarlaıdy QazAqparat tilshisi.
Energetıka mınıstri Bolat Aqsholaqov vedomstvonyń keńeıtilgen alqa májilisindeosyndaı málimet keltirdi.
«Gaz salasyn damytýdyń 2026 jylǵa deıingi keshendi jospary qabyldandy. Osy keshendi josparda gazdyń resýrstyq bazasyn ulǵaıtý, gaz naryǵyn reformalaý jáne azamattardyń áleýmettik osal sanattary úshin baǵalardy tejeý jónindegi sharalar kózdeledi. Bıyl suıytylǵan gaz aınalymynyń ashyqtyǵyn qamtamasyz etý maqsatynda suıytylǵan munaı gazyn retteý protsesteriniń reınjınırıngi máseleleri boıynsha zań qabyldaý josparlanýda», - dedi ol.
Onyń aıtýyna qaraǵanda, 2022 jyly eldi kógildir otynmen qamtý deńgeıi 59% bolǵan.
«2023 jyly 74 mlrd teńgege 86 jobany iske asyra otyryp, halyqty gazdandyrý úlesin 60%-ǵa deıin jetkizý josparlanyp otyr. Bul 56 aýyldyq eldi mekendegi 167 myń azamatty gazben qamtamasyz etýge múmkindik beredi. Nátıjesinde, respýblıkanyń 11,4 mln azamaty gazben qamtamasyz etiledi», - dedi mınıstr.