Elimizde fıskaldyq operatorlardyń sany artady

NUR-SULTAN. QazAqparat – Jyl sońyna deıin Qazaqstanda fıskaldyq derekter qyzmeti operatorlary retinde úsh kompanııa qyzmet etedi. Bul týraly Úkimet úıinde ótken baspasóz máslıhatynda QR Qarjy vıtse-mınıstri Rýslan Eńsebaev aıtty, dep habarlaıdy QazAqparat tilshisi.

Onyń sózine qaraǵanda, salyq tóleýshiler úshin onlaın-kassalyq mashınalardy engizý kezinde tirkeý tártibi barynsha jeńildetilýde. Kásipkerge salyq ótinishin memlekettik kirister organdaryna kelip tapsyrýdyń qajeti joq, onlaın-kassalyq mashınalardyń derekteri fıskaldyq derekter operatorynyń veb-saıty arqyly elektrondy túrde jiberiledi. Bul qyzmettiń nátıjesi fıskaldyq operatordyń saıtyndaǵy jeke kabınet arqyly alynady jáne bul protsess bar bolǵany 1 kúndi alady (buryn 5 kún bolǵan-avt).

Sonymen qatar, vıtse-mınıstr jyl sońyna deıin fıskaldyq operatorlardyń sany artatynyn jetkizdi.

«Biz básekelestik ortany qurý boıynsha jumysty júrgizýdemiz. Eger osyǵan deıin bir ǵana operator bolsa, al qazir olardyń sany úsheýge jetti. Bul turǵyda «Qazaqtelekom», «Transtelekom» jáne «Kar-Tel» qamtylyp otyr. «Transtelekom» AQ 3 qyrkúıekten bastap qyzmetin usynýdy bastady. «Kar-Tel» JShS osy jyldyń aıaǵyna deıin óndiristik ortaǵa shyǵýdy josparlap otyr», - dedi R. Eńsebaev.

Osylaısha, bızneske onlaın BKM arqyly derekterdi berý operatoryn tańdaýǵa múmkindik beriledi.

Búgingi tańda baqylaý-kassalyq mashınalardyń memlekettik tizilimine onlaın-kassalyq mashınalardyń 85 úlgisi tirkeldi. Onyń ishinde BKM úshin barlyq zańdy talaptarǵa sáıkes keletin mobıldi qurylǵylarda jumys isteıtin jáne otandyq ázirleýshilerdiń ónimi bolyp sanalatyn 15 úlgi kiredi. Salyq tóleýshiler kásipkerlik qyzmette qoldanýǵa yńǵaıly kassa úlgisin óz betinshe tańdaýǵa quqyly.