Elimizde et kóleminiń óndirisi 3,6 paıyzǵa ósti

NUR-SULTAN. QazAqparat – Mal sharýashylyǵy sektorynda 4 paıyz deńgeıinde turaqty ósim saqtalyp otyr. Bul týraly QR Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«Jyldyń qorytyndysy boıynsha jalpy ónim 2,3 trln teńgege deıin ósti. Nesıelendirý jáne qosymsha sýbsıdııalaý arqyly byltyr júzege asyrylǵan sharalar óziniń oń nátıjesin berdi. Bıyldyń tórt aıy boıynsha aýyl sharýashylyǵy maldarynyń ósiminiń oń dınamıkasy baıqalady: iri qara maly 4,1 paıyzǵa, qoı men eshki 2,7 paıyzǵa, jylqy 7,6 paıyzǵa ósti», - dedi mınıstr Úkimet otyrysynda.

Onyń sózine qaraǵanda, et kóleminiń óndirisi 3,6 paıyzǵa ósip, 314 myń tonnany qurady, sondaı-aq sút óndirisi 3,2 paıyzǵa ósip, 1,5 mln tonnany qurady. Jumyrtqa óndirisi syrtqy naryqta suranystyń tómendeýi saldarynan 6 paıyzǵa (1,6 mlrd dana) azaıyp otyr.

«Qaıta óndelgen mal ónimderin óndirý de kólemi artyp otyr. Máselen, shujyq ónimderi 20,9 paıyzǵa(18,8 myń tonna), et konservileri 9 paıyzǵa (3 myń tonna), óndelgen balyq 51,3 paıyzǵa (3,9 myń tonna) ósken. Sút ónimderi boıynsha ortasha ósim 10 paıyz deńgeıinde saqtalyp otyr. Tek óndelgen sút óndirisiniń kólemi karantın kezindegi suranystyń tómendeýinen jáne negizgi shıkizatty uzaq merzimge saqtalatyn sút ónimderine baǵdarlaýǵa baılanysty tómendep otyr», - dedi S. Omarov.