Elimizde erekshe bilim berýdi qajet etetin balalardy qoldaý qadamdary qandaı

NUR-SULTAN. QazAqparat - Erekshe bilim berýdi qajet etetin balalardy qoldaý aıryqsha mańyzdy. Osy oraıda bul baǵyttaǵy jumystarǵa barynsha kúsh salyp, balalarǵa qolaıly jaǵdaı jasaý baǵytynda elimizde tıisti qadamdar jasalyp keledi. Sebebi bilimdi urpaqty tárbıeleý jolynda eshqandaı kedergi bolmaýy kerek. Bul rette Bilim jáne ǵylym mınıstrligi erekshe bilim berýdi qajet etetin balalarǵa qatysty qandaı jaǵdaı jasalyp jatqanyn túsindirdi, dep habarlaıdy QazAqparat tilshisi.

«El aýmaǵynda 82 oblystyq, qalalyq jáne aýdandyq psıhologııalyq medıtsınalyq-pedagogıkalyq komıssııa, psıhologııalyq-pedagogıkalyq súıemeldeýdiń 207 kabıneti, 14 ońaltý ortalyǵy, 98 arnaıy mektep, 38 arnaıy balabaqsha, ınklıýzııany qoldaýdyń 400-den astam kabıneti qyzmet etip jatyr», - delingen vedomstvo aqparatynda.

Erekshe balalardy qoldaýdaǵy máselelerdiń biri bilim alý úshin arnaıy jaǵdaıdy qurýǵa baılanysty.

Atap aıtqanda, erekshe bilim berý qajettilikteri barlar úshin arnaıy jaǵdaı 2972 (38,2 paıyz) memlekettik mektepke deıingi uıymda jáne 4426 (59,4 paıyz) jalpy bilim berý metebinde qarastyrylǵan.

2021 jyldan bastap zańnamalyq deńgeıde erekshe bilim berý qajettigi bar balalardyń damý erekshelikteri men áleýetti múmkindikterine sáıkes oqý baǵdarlamalaryn beıimdeý boıynsha norma bekitildi.

Mańyzdy talaptardyń biri balany jalpy bilim berý ortasyna qosqan kezde laıyqty deńgeıde súıemeldeý bolyp otyr.

Mınıstrlik buıryǵymen (2013 jylǵy aqpandaǵy № 50 buıryq) bilim berýdi uıymdastyrý Nomenklatýrasyna ınklıýzııany qoldaý kabınetteri qosyldy.

«Qamqorlyq» jol kartasy aıasynda 2020 jyly Atyraý, Almaty, Shyǵys Qazaqstan, Batys Qazaqstan, Jambyl, Qostanaı, Túrkistan oblystarynda jáne Nur-Sultan qalasyndaǵy jalpy bilim berý mektepterinde ınklıýzııany qoldaýdyń 16 kabıneti ashyldy.

Budan bólek, jergilikti bıýdjet pen memlekettik-jekeshelik seriktestik aıasynda byltyr bilim berý uıymdarynda erekshe bilim berý qajettilikteri bar 2 889 balany qamtıtyn ınklıýzııany qoldaýdyń 332 kabıneti ashyldy. Atalǵan kabınetterde 396 arnaıy pedagog, 55 muǵalim, 189 psıholog, 443 pedagog-assıstent jumys istep jatyr.

«Qazirgi kezde ınklıýzııany qoldaýdyń 400 kabıneti qyzmet etip jatyr, onyń ishinde 68-i 2021 jyly ashyldy. Olarda psıhologııalyq-pedagogıkalyq qoldaýmen 3666 bala qamtylǵan. Sonymen qatar 370 arnaıy pedogog, 313 psıholog, 596 pedagog-assıstent jumys istep jatyr», - delingen Bilim mınıstrligi málimetinde.

Munymen qosa, taǵy 525 pedagog-assıstent mektepterde oqytý-tárbıeleý protsesi kezinde erekshe bilim berý qajettiligi bar balalardy súıemeldeıdi. Pedagog-assıstentterdi mektepke deıingi uıymdardyń sabaq kestesine qosý boıynsha jumys júrgizilip jatyr.

Bıyl qabyldanǵan «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» Zańynda erekshe bilim

berilýine qajettiligi bar balalardy arnaıy psıhologııalyq-pedagogıkalyq qoldaýǵa memlekettik bilim berý tapsyrysy boıynsha normalar bekitildi.

Memlekettik tapsyrys 2022 jyldyń 1 qyrkúıeginen bastap iske asyrylady.

Sonymen qatar bul sala boıynsha bilim týraly zańnamada da tıisti talaptar qarastyrylǵan.

Zańnamalyq deńgeıde bilim berý uıymdarynda psıhologııalyq-pedagogıkalyq súıemeldeý qyzmetterin qurý boıynsha norma bekitilgen.

Atap aıtqanda, mınıstrlik basqa da ortalyq memlekettik jáne jergilikti atqarýshy organdarmen birlese atalǵan saladaǵy jańa normalardy, sondaı-aq bilim alý úshin arnaıy jaǵdaıdy jasaý tártibin túsindirý boıynsha keń aýqymdy is-sharalardy qabyldady.

Qazirgi ýaqytta mınıstrlik orta bilimdi modernızatsııalaý jobasyn iske asyryp jatyr. Jobanyń ınklıýzıvti bilim berýdi qoldaý boıynsha baǵyty aıasynda erekshe bilim berý qajettigi bar balalarmen jumys isteý úshin pedagogtar men memlekettik uıymdardyń mamandaryn oqytý josparlanǵan.

Bul óz kezeginde eldiń ár óńirin atalǵan salada halyqaralyq ádisnamany ıgergen bilikti kadrlarmen qamtamasyz etýge múmkindik beredi. Bul qadamdardy júzege asyrý 2022 jylǵa josparlanǵan.