Elimizde elektrondy PIK júıesi qalaı iske qosylady
«Elektrondy PIK eki baǵyttan turady. Birinshiden, «QR Turǵyn úı máselelesi boıynsha zańǵa ózgerister men tolyqtyrýlar engizý týraly» zań jobasy boıynsha biz «E-shańyraq» aqparattyq baǵdarlamasyn ázirledik. Ol joba paıdalanýǵa 100 paıyz daıyn. Biz ony aldaǵy ýaqytta júzege asyramyz. Ekinshiden, bul aqparattyq baǵdarlamanyń standarttary bar. Kóppáterli úılerde turatyn halyqqa qyzmet kórsetýshi servıstik kompanııalardyń kóp ekenin bilesizder. Olardyń ortasyna kıligip, básekeli ortanyń zańyn buzǵymyz kelmeıdi. Alaıda biz ol kompanııalarǵa bul standartty qyzmetterdi aqparattyq turǵyda qoljetimdi etip kórsetýin talap etemiz. ıAǵnı, adamdar «E-shańyraq» portaly arqyly jaýapty kompanııanyń naqty qandaı qyzmetke qansha aqsha jumsap jatqanyn bilýi kerek. Ol aqparat jaýapty memlekettik organdarǵa da qoljetimdi bolady», - dedi Qaıyrbek Óskenbaev «QR Turǵyn úı máselelesi boıynsha zańǵa ózgerister men tolyqtyrýlar engizý týraly» zań jobasy talqylanǵan Senattaǵy otyrystan keıin tilshilerge bergen jaýabynda.
Vıtse-mınıstrdiń aıtýynsha, bul júıe jaýapty ınspektsııanyń jumysyn jeńildetedi. Bir kóppáterli úıde turatyn 10 adamnan shaǵym tússe, ortaq portalda qyzyl belgi janyp, kompanııadan bul kemshilikterdi joıý talap etiledi.
«Biryńǵaı baqylaý kómegimen turǵyndardyń barlyǵyna sapaly qyzmet kórsetkimiz keledi. Osy elektrondy formatty standart túrinde iske qostyq. Árbir kompanııa osy portalmen jumys júrgizýge mindetti. «QR Turǵyn úı máselelesi boıynsha zańǵa ózgerister men tolyqtyrýlar engizý týraly» zańy qabyldanǵannan keıin portal birden jumysyn bastaıdy», - dedi ol.
Eske sala ketsek, búgin «QR Turǵyn úı máselelesi boıynsha zańǵa ózgerister men tolyqtyrýlar engizý týraly» zań jobasy Parlament Senatynyń ekinshi oqylymyna joldandy.