Elimizde elektr energııasymen qamtý úshin qandaı shara qabyldanyp jatyr
«Bıylǵy jyldyń qorytyndysy boıynsha elektr energııasyn óndirý saǵatyna 112,3 mlrd kVt-ty qurap otyr. Tutyný kólemi ótken jylmen salystyrǵanda 6,3 paıyzǵa ósti. Osy oraıda qazan-qarasha aıynda 0,25 mlrd kVt kóleminde elektr energııasynyń tapshylyǵy baıqaldy. Atalǵan tapshylyq Reseı Federatsııasynyń energııa kózderi esebinen óteldi. 2030 jylǵa qaraı elektr energııasyn óndirýdi saǵatyna 141,2 mlrd kVt-qa deıin ulǵaıtý josparlanyp otyr. Osylaısha, el ekonomıkasynyń elektr energııasyna degen qajettiligin óteý maqsatynda óndiristi 11 GVt-qa deıin jetkizý mindeti tur. Ol mindetke jumys istep turǵan elektr stantsııalaryn qaıta jańǵyrtý, jańa stantsııalar salý, sondaı-aq jańartylatyn energııa kózderin iske qosý arqyly qol jetkizilmek», - dedi M. Myrzaǵalıev Úkimet otyrysynda.
Onyń aıtýynsha, bıyl elimizde jańartylatyn energııa kózin óndiretin 19 nysan iske qosyldy.
«Otyn-energetıkalyq kesheni salasynda jalpy somasy 29,8 trln teńge bolatyn 157 jobany iske asyrý josparlanǵan. Mınıstrlik belgilengen josparlardy oryndaý úshin jáne alynǵan mindettemeler sheńberinde maqsattarǵa qol jetkizý úshin barlyq kúsh-jigerin salatyn bolady. Búgingi kúni bizdiń mınıstrlik 2030 jylǵa deıingi elimizdiń otyn-energetıkalyq keshenin odan ári damytý tujyrymdamasyn ázirledi», - deıdi vedomstvo basshysy.
Buǵan deıin mınıstr Túrkistan oblysynda jańa munaı óńdeý zaýyty jobasynyń qolǵa alynǵanyn aıtty.