Elimizde ekologııalyq problemalardy sheshýdiń jol kartasy ázirlendi

NUR-SULTAN. QazAqparat – Qazaqstanda ekologııalyq máselelerdi sheshýge arnalǵan jol kartasy ázirlendi. Ol 17 baǵyttan turady. Bul týraly QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasov málim etti, dep habarlaıdy QazAqparat tilshisi.

«Bizdiń mınıstrlik «Halyq únine qulaq asatyn memleket» tujyrymdamasy aıasynda ekologııalyq problemalardy qoǵammen, ásirese ekobelsendilermen birlesip sheshý jolyn qarastyrdy. Jurtshylyqpen talqylaý nátıjesinde ákimdik jáne basqa da quzyrly organdarmen birlesip ekologııalyq problemalardy sheshýdiń 17 jol kartasy ázirlendi. Onyń aıasynda barlyǵy 485 is-shara qarastyrylǵan. Bıyl sonyń 95-in ótkizý josparlanyp otyr. Bıylǵy jyldyń 1 toqsanynda 70 is-shara ótkizý josparlanyp, onyń 42-si oryndaldy jáne 28 is-shara endi qolǵa alynady», - dedi Z. Joldasov OKQ-de ótken baspasóz máslıhatynda.

Onyń aıtýynsha, atalǵan jol kartasy óz nátıjesin 2025 jylǵa qaraı bere bastaıdy.

«Ekologııalyq problemalardy sheshý jol kartasyn iske asyrý 2025 jylǵa qaraı elimizdegi 10 qala atmosferasynyń lastaný ındeksin joǵary deńgeıden ortasha deńgeıge deıin tómendetýge múmkindik beredi. Sol arqyly iri qalalar aýasynyń jaı-kúıi jaqsara túsedi. Odan bólek, qatty turmystyq qaldyqtarǵa arnalǵan 7 jáne 24 jańa polıgon salý josparymyz bar. Sol sııaqty 12 qatty turmystyq qaldyq polıgony qaıta jańǵyrtylady», - deıdi ol.

Buǵan deıin komıtet basshysy elimizdegi aýa las 10 qalany atady.