Elimizde dezınfektsııalyq quraldar men mıneraldy tyńaıtqyshtarǵa suranys artty
10:22, 16 Aqpan 2021
NUR-SULTAN. QazAqparat – Farmatsevtıka ónerkásibinde óndiris kólemi 4 paıyzǵa artty. Bul týraly Úkimet otyrysynda qańtar aıyndaǵy eldiń áleýmettik-ekonomıkalyq damýy taqyrybyn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.
«Farmatsevtıka ónerkásibinde óndiris kólemi 4 paıyzǵa artty. Negizinen, ósim halyqtyń dárilik zattar men medıtsınalyq buıymdarǵa degen suranysynyń artýy esebinen boldy. Dezınfektsııalyq quraldar men mıneraldy tyńaıtqyshtarǵa suranystyń artýy hımııa ónerkásibiniń óndiris kólemin arttyrdy. Ósim 12,8 paıyzdy qurady», - dedi mınıstr.
Budan buryn habarlanǵandaı, B. Atamqulov 2021 jyldyń qańtar aıynda elimizdiń óńdeý ónerkásibinde oń úrdis saqtalǵanyn aıtty.
Tústi metallýrgııada da oń dınamıka baıqaldy. Ósim 106,6 paıyz boldy. Oǵan tazartylǵan altyn, tazartylǵan kúmis, quıma altyn, túıirshik kúmis, katodty mystyń jáne basqa da kórsetkishterdiń ósimi esebinen qol jetkizildi.