Elimizde dárigerdiń kásiptik jaýapkershiligine qatysty mindetti saqtandyrý júıesi engizilmek
ASTANA. QazAqparat – Elimizde dárigerlerdiń kásiptik jaýapkershiligine qatysty mindetti saqtandyrý júıesi engiziledi. Bul týraly Májiliste keıbir zańnamalyq aktilerge densaýlyq saqtaý máseleleri boıynsha ózgerister engizý týraly zań jobasyn tanystyrý kezinde Densaýlyq saqtaý mınıstri Ajar Ǵınııat aıtty, dep habarlaıdy QazAqparat.
«Medıtsına qyzmetkerleriniń praktıkalyq qyzmeti qoǵamnyń ıgiligi úshin únemi qaýipke ushyraıtyn mamandyqtarǵa jatady, ıaǵnı kúrdeli ári jaýapty mamandyq. Álemdegi ozyq tájirıbeni qaraı otyryp, medıtsına qyzmetkerleriniń kásiptik jaýapkershiligi boıynsha mindetti saqtandyrý júıesin kezeń-kezeńmen engizý josparlanyp otyr. Mundaı tásil medıtsınalyq kómektiń sapasyn arttyrýǵa múmkindik beredi jáne halyqaralyq areneda Qazaqstannyń densaýlyq saqtaý salasy reıtıngisine de áser etedi», - dedi A. Ǵınııat.
Onyń atýynsha, «Halyq densaýlyǵy jáne densaýlyq saqtaý júıesi týraly» QR Kodeksiniń 270-babynda medıtsınalyq kómek kórsetý kezinde patsıenttiń ómirine nemese densaýlyǵyna zııan keltirilgen jaǵdaıda medıtsına qyzmetkerleriniń kásiptik jaýapkershiligin saqtandyrý quqyǵy zańnamalyq túrde bekitilgen.
«Ondaı norma bar, al zań jobasy osy baptyń iske asyrý joldaryn bekitedi», - dedi mınıstr.
Osy oraıda vedomstvo basshysy zań jobasy medıtsına qyzmetkerleriniń mártebesin arttyrýǵa, naýqastardyń quqyqtaryn qorǵaýǵa jáne medıtsınalyq kómektiń sapasyn arttyrýǵa baǵyttalyp otyrǵanyn aıtty.
«Zań jobasyn ázirleý kezinde halyqaralyq tájirıbeler zertteldi. Máselen, Anglııada medıtsınalyq mekemeniń ákimshiligi medıtsınalyq qatelik jibergen medıtsına qyzmetkeriniń tıisti jumysyn qamtamasyz etpegeni úshin azamattyq jaýapkershilikke tartylýy múmkin. Izraılde medıtsına qyzmetkeri qyzmetin júzege asyrǵan mekeme nemese uıym tek azamattyq-quqyqtyq jaýapqa tartylady, olarda qylmystyq is eskerilmegen. Al AQSh-ta medıtsınalyq mekememen birge saqtandyrý kompanııalary da jaýapty bolady. Kanadalyq júıede qyzmetin teris paıdalanǵan dárigerlerdi provıntsııalyq lıtsenzııalaý organy jazalaıdy. Fınlıandııada medıtsınalyq kómek kórsetýmen aınalysatyn barlyq aýrýhanalar men kompanııalar saqtandyrylýy tıis. Medıtsına salasynyń qyzmetkerlerine jeke saqtandyrý sharttaryn bekitýdiń jáne kompanııalarǵa saqtandyrý jarnalaryn tóleýdiń qajeti joq. Bul saladaǵy oqıǵalardy patsıentterdi saqtandyrý ortalyǵy qarastyrady, medıtsınalyq personal onymen aınalyspaıdy», - dedi A. Ǵınııat.
Onyń sózine qaraǵanda, Reseıde qylmystyq zańda atalǵan qylmystar jáne jalpy medıtsınalyq qylmystar úshin arnaıy norma joq. Adamǵa qarsy qylmystar týraly taraýda mamannyń óziniń kásiptik mindetterin tıisinshe oryndamaýy saldarynan jasalǵan is-áreket úshin jaýapkershilik kózdelgen.