Elimizde bólshek saýda kólemi ósti

ASTANA. QazAqparat - Bólshek saýda kólemi bıylǵy qańtar-qarasha aılarynda 13 689,8 mlrd teńgeni qurady. Bul 2021 jylǵy tıisti kezeńge qaraǵanda 2% joǵary. Bul týraly QazAqparat Ulttyq statıstıka bıýrosyna silteme jasap habarlaıdy.

Dara kásipkerlermen taýarlardy bólshek saýdada ótkizý 2,5% ósti.

Azyq-túlik taýarlarynyń bólshek saýdanyń jalpy kólemindegi úlesi 35,4% qurady, azyq-túlikke jatpaıtyn taýarlar – 64,6%.

Satý kóleminiń eń kóp ósimi azyq-túlikke jatpaıtyn taýarlar boıynsha, atap aıtqanda arnaıy dúkenderdegi jıhazdar, toqyma jáne shulyq buıymdary, avtomobıl bólshekteri, kıim, kompıýterler, perıferııalyq jabdyqtar men baǵdarlamalyq qamtamasyz etý, bylǵarydan jasalǵan buıymdar, kosmetıkalyq taýarlar men dárethana kerek-jaraqtary, jaryqtandyrý quraldary men turmystyq taýarlar, saǵat jáne zergerlik buıymdar, motor otyny, mýzykalyq aspaptar, elektr quraldary, farmatsevtıkalyq taýarlar jáne aıaq kıim satatyn kásiporyndarda baıqaldy.

2022 jylǵy 1 jeltoqsanǵa saýda kásiporyndarynyń taýar qorlarynyń kólemi (esep bergen kásiporyndar boıynsha) bólshek saýdada 1 351,8 mlrd teńgeni qurady.