Elimizde blokcheın mamandaryn daıarlaıtyn aýqymdy baǵdarlama iske qosylmaq
Bul arqyly Qazaqstan joǵary jáne joǵary oqý ornynan keıingi bilim berý uıymdarynda blokcheın tehnologııalary salasy boıynsha 40 myńnan astam maman daıyndamaq. Osy maqsatta búgin elordada eki mınıstrlik, Ulttyq Bank jáne «Binance Kazakhstan» uıymdary ózara yntymaqtastyqta jumys isteýge kelisip, memorandýmǵa qol qoıdy.
«Binance Academy-men memorandýmǵa qol qoıý rásimi – «Binance» bas dırektory Chanpen Chjaonyń mamyrdaǵy sapary aıasynda bastalǵan seriktestiktiń jemisti jalǵasy. Osy kelisim sheńberinde kadrlardy daıyndaý álemdik krıptoındýstrııada qazaqstandyq tehnologııalar úlesin ulǵaıtýǵa jáne Qazaqstanda aımaqtyq habty damytý maqsatyna jetýge múmkindik beredi», - dedi Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.
Baǵdarlamany engizý tórt kezeń boıynsha júredi. Alǵashynda JOO-nyń oqytýshylary úshin arnaıy baǵdarlama ázirlenedi. Keıin ýnıversıtetterdiń oqytýshylyq quramy arnaıy kýrstardan ótedi. Sodan soń, ustazdar men JOO-nyń basshylyǵy birlesip, akademııalyq baǵdarlama ázirleıdi. Baǵdarlama 4-5 pánnen turady. Sońǵy kezeńde stýdentterge osy sala boıynsha bilim berý bastalady. JOO oqytýshylaryn oqytý jáne trenıng ótkizý 2023 jyly aqpan aıynda bastalyp, mamyrǵa deıin jalǵasady. Al, basty kontıngent – stýdentterdi oqytý 2023 jyldyń qyrkúıeginen bastalady.
«Bizdiń ekonomıkamyz úshin básekege qabiletti mamandardy daıarlaýǵa múddeli bola otyryp, IT salasynyń ókilderimen birlesip, bul baǵyt boıynsha bilim berý jobalaryn odan ári damytýdyń berik irgetasyn qalamaqpyz. Bizdiń jemisti yntymaqtastyǵymyzdyń arqasynda qazaqstandyq joǵary bilim berý júıesi el ekonomıkasynyń muqtajdyǵy úshin ǵana emes, jahandyq eńbek naryǵy úshin de blokcheın ındýstrııasy salasyndaǵy mamandardy jetkizýshi bolatynyna senimdimin», - dedi Ǵylym jáne joǵary bilim mınıstri Saıasat Nurbek.
Blokcheın tehnologııalary salasyndaǵy alǵashqy qazaqstandyq mamandar 2024 jyly shyǵarylady.
Eske sala keteıik, bıyl Prezıdent Qasym-Jomart Toqaev «Binance» negizin qalaýshy jáne bas dırektory Chanpen Chjaomen kezdesken bolatyn. Onda Memleket basshysy blokcheın tehnologııalary salasyndaǵy bilim berý baǵdarlamalarynyń perspektıvalaryn talqylap, ony elimizide engizýdi qarastyrýdy tapsyrǵan bolatyn.