Elimizde birdeı nysandardyń qurylys quny boıynsha eleýli aıyrmashylyq bar – Májilis
Búgin Májilistegi Úkimet saǵatynda depýtat Mádı Ahmetov «Aýyl-El besigi» jobasyna byltyr 106 mlrd teńge bólingenin aıta kele, Úkimet pen oblystardyń ákimdikteri jobany 90 paıyzǵa oryndaǵany jaıynda esepterin bergenin jetkizdi.
«Degenmen, birdeı qýaty bar jobalarǵa qarjat bólý ondaǵan nemese odan da kóp aıyrmashylyqty qurap otyr. Mysaly, Qyzylorda oblysy Jańaqorǵan aýdanynyń Shalqııa kentindegi 150 oryndyq aýyldyq klýbtyń qurylysy 50 mln teńgeni qurasa, dál sol 150 orynǵa arnalǵan klýbtyń Almaty oblysy Alakól aýdany Aqtúbek aýylyndaǵy qurylysy 518 mln-nan astam qarjyny qurady. Aıyrmashylyq 10 esege jetken. Al Mańǵystaý oblysy Túpqaraǵan aýdanynyń Aqshuqyr aýylynda 160 oryndyq dene shynyqtyrý saýyqtyrý kesheniniń qurylysy 255 mln teńge bolsa, Qaraǵandy oblysy Buqar jyraý aýdanynyń Botaqara kentinde eki ese úlken 320 oryndyq keshenniń qurylysyna 89 mln teńge jumsalǵan. Osyndaı mysaldardy kóptep keltirýge bolady. Ne sebepti mınıstrlik qýattylyǵy birdeı nysandar quny boıynsha eleýli aıyrmashylyqqa jol bergen?», - dep surady M. Ahmetov.
Óz kezeginde Ulttyq ekonomıka mınıstri Álibek Qýantyrov óńirlerde uqsas jobalardyń quny boıynsha aıyrmashylyq kezdesip jatqanyn aıtty.
«Bul máselelerdi qazir jan-jaqty qarap jatyrmyz. Keıbir ólshemsharttarǵa sáıkes, bir nysandarda qosymsha jabdyqtar bolsa, qalǵandarynda bul jabdyqtar alynbaýy múmkin. Qazir óńirlik standarttardy qarastyrǵanda osy máselelerdi qaıta pysyqtaıtyn bolamyz», - dedi mınıstr.
Sonymen qatar QR Indýstrııa jáne ınfraqurylymdyq damý vıtse-mınıstri Erkebulan Daýylbaev elimizde nysandarǵa qatysty tıptik jobalar ázirlengenin eske saldy.
«Olar salalyq mınıstrliktiń ótinimi boıynsha daıarlanady. Sáıkesinshe, Bilim jáne ǵylym, Densaýlyq saqtaý mınıstrlikteri baǵytynda tıptik jobalar bar, sondaı-aq olar jergilikti atqarýshy organdarǵa qoljetimdi. Túrli óńirlerde qurylystyń quny boıynsha aıyrmashylyq máselesine toqtalsaq, bizde naýryz aıynda ortasha kórsetkish boıynsha qaǵıdalar bekitildi. Onda barlyq áleýmettik nysan tizbegi kórsetilgen. Osy oraıda nysannyń sharshy metri úshin shekti baǵa bekitildi. Qazirgi kezde osy erejeden tys saraptamadan ótýge múmkin bolmaıdy. Eger 300 oryndyq mektep salynsa, onda bir sharshy metrdiń shekti quny qarastyrylǵan. Sonymen qatar, qurylys kezinde tapsyrys berýshige de baılanysty bolady, ıaǵnı keıbiri joǵary baǵamen oǵan jabdyqtardyń qunyn qosady», - dedi vıtse-mınıstr.
Bul máselege qatysty Májilis tóraǵasynyń orynbasary Pavel Kazantsev birdeı nysandar qurylysynda quny boıynsha eselengen aıyrmashylyq faktilerin tekserý kerek ekenin aıtty.
«Osyndaı 10 ese aıyrmashylyqqa negiz bar ma? Aýylda qandaı erekshe jabdyqtar qoıyp jatyr? Bul máseleni egjeı-tegjeıli qaraý kerek», - dedi P. Kazantsev.