Elimizde bir adam aıyna 1,5 keli qant tutynady
Degenmen, energyprom.kz portalynyń málimetinshe, elimizde tátti ónimderdi tutyný osy jyly birshama tómendegen. Máselen, 2022 jyldyń birinshi toqsanynda jan basyna shaqqanda ortasha eseppen 10,3 keli qant, djem, bal, shokolad jáne kondıterlik ónimder tutynylǵan. Bul 2021 jyldyń birinshi toqsanyndaǵy kórsetkishpen salystyrǵanda 1,3 paıyzǵa tómen. Esepti kezeńde bir adam 4,5 keli qant paıdalanǵan. Al bul kórsetkish ótken jyldyń 3 aıymen salystyrǵanda 7,2 paıyzǵa joǵary. Sonymen qatar qazaqstandyqtardyń balmuzdaq (1-toqsanda jan basyna shaqqanda 275 grammǵa deıin, ósim 2,6 paıyz) pen shokoladqa (223 gramǵa deıin, 0,5 paıyz) qumary artqany baıqalady.
Elimizde shaqpaq qant tutyný kólemi 27,6 paıyzǵa deıin qysqarǵan. Munan bólek, elimizde tosap, djem, ball, konfet, glazýrlengen shokolad jáne basqa da táttilerdi tutyný kólemi azaıyp keledi.
Osy jyldyń 1-toqsanynda Qazaqstannyń óńirleri arasynda qant, djem, bal, shokolad jáne kondıterlik ónimder eń kóp tutyný Almaty (halyqtyń jan basyna shaqqanda ortasha eseppen 12,46 keli) men Túrkistan (11,28 keli) oblystarynda, sonymen qatar Almaty qalasynda (11,27 keli) tirkelgen. Eń tómen kórsetkish Shymkent qalasynda (6,9 keli), Atyraý (7,95 keli) jáne Shyǵys Qazaqstan (8,52 keli) oblystarynda baıqalady.
Aıta keterligi, elimizde qant tóńiregindegi dúrbeleń jalǵasyp jatyr. Ónim tapshylyǵy qantqa táýeldi kondıterlik kásiporyndarǵa qazirdiń ózinde aýyr tıip otyr. Aıtalyq, «Habar-24» telearnasynyń habarlaýynsha, Oral kondıterleri maýsym aıynyń basynda qant tapshylyǵyna jáne baǵasynyń qymbattaýyna baılanysty ónimderin qymbattatýǵa májbúr bolǵan. Elimizdegi eń iri kondıterlik fabrıka «Lotte Rahat» AQ-ta daıyndaý barysynda qosylatyn qant úlesi keıbir tátilerdi shyǵarýyn toqtatqanyn málimdegen edi.
Alaıda ótken aıdyń sońynda Saýda jáne ıntegratsııa mınıstrligi Saýda komıtetiniń tóraǵasy Erjan Qazanbaev elimizde qant qory jetkilikti, shamamen 67 myń tonna qant bar ekendigin aıtqan bolatyn .
Ulttyq statıstıka bıýrosynyń derekterine sáıkes, elimizdiń qalalarynda qanttyń ortasha baǵasy 1 kelisine 439 teńgeni quraıdy. Bul rette eń qymbat qant Almaty (463 teńge), Qaraǵandy (461) jáne Atyraý (460) qalalarynda saýdalanýda. Al qanttyń arzan baǵasy Aqtóbe (378 teńge), Aqtaý (397) jáne Petropavl (401) qalalarynda tirkelgen.