Elimizde baılanys qyzmetiniń tarıfteri tómendeıdi

ASTANA. QazAqparat - 2019 jyldan bastap baılanys qyzmetiniń tarıfteri tómendeıdi. Bul týraly búgin Úkimettiń selektorlyq rejımdegi otyrysynda QR Aqparat jáne kommýnıkatsııalar vıtse-mınıstri Dınara Şeglova aıtty, dep habarlaıdy QazAqparat tilshisi.

«Qazirgi ýaqytta kabeldik káriz júıelerin jalǵa berý qyzmettik tarıfterin, sonymen qatar aýyldarda kabeldik telefon men ınternettiń sýbsıdııalanǵan tarıfterin retteý mınıstrliktiń quzyretinde. Kabeldik qyzmetter zańdy tulǵalarǵa kórsetilip, tarıftteri sońǵy 2 jyldyń ishinde ózgergen joq», - dedi ol.

Vıtse-mınıstrdiń dereginshe, kabeldik telefon jáne ınternet tarıfteri aýyldyq turǵyndarǵa 2013 jyldan bastap,  óz qunynan  tómen baǵamen qyzmet kórsetildi. Atap aıtqanda, aýyldarda kabeldik telefon baılanysy tarıfi 596 teńge, al ózindik quny 1125 teńge, aýyldarda ınternet tarıfi 982 teńgeden 1964 teńgege deıin tarıftik paketter bar. Al onyń ózindik quny 2932 teńgeni quraıdy.

«Aýyldyq jerlerde osy qyzmet kórsetý boıynsha ótemaqy bıýdjet esebinen jasalady. Aǵymdaǵy jyly osy qyzmetterdi sýbsıdııalaýǵa 8,7 mlrd teńge bólingen. Dúnıejúzilik ekonomıkalyq forýmnyń jahandyq básekege qabilettilik ındeksinde baılanys qyzmetteriniń tarıftik qoljetimdilik uıaly baılanys tarıfteri boıynsha Qazaqstan 140 eldiń ishinde 29-orynda. Al bekitilgen keń jolaqty ınternet qyzmetteri boıynsha 20-orynda tur», - dedi ol.

Dınara Şeglovanyń sózine qaraǵanda, QR Premer-Mınıstriniń tapsyrmasyn oryndaý maqsatynda baılanys qyzmetterin tómendetý boıynsha mınıstrlik «Qazaqtelekom», «Transtelekom», «Qaztranskom», KCell, QarTel, Mobile baılanys operatorlarymen kelissóz júrgizgen.

«Nátıjesinde kelesi aıdyń aıaǵyna deıin qoljetimdi áleýmettik tarıfter paketin ázirlep,  baılanys baǵasyn tómendetý usynyldy. Atalǵan tarıftik paketter boıynsha aqparat BAQ-ta jarııalanady»,-  dedi vıtse-mınıstr.