Elimizde azyq-túlik baǵasy bir jylda 9,2 paıyzǵa qymbattady

NUR-SULTAN. QazAqparat – Qazaqstanda 1 jyldyń ishinde azyq-túlik taýarlarynyń baǵasy 9,2 paıyzǵa qymbattady. Bul jaıynda QR UEM Statıstıka komıtetinen málim etti, dep habarlaıdy QazAqparat.

«Baǵa azyq-túlik taýarlaryna bir jylda (2020 jylǵy qańtar 2019 jylǵy qańtarǵa) 9,2 paıyz ósti. Nan ónimderi jáne jarmalar, et, balyq jáne teńiz ónimderi, sút ónimderi, jumyrtqa, maı jáne tońmaı, jemister men kókónister, kondıterlik ónimder, alkogolsiz sýsyndar jáne alkogoldi ishimdikter qymbattady. Al qant arzandady. 2020 jylǵy qańtarda jarma ónimderi tobynda qaraqumyq jarmasyna ortasha baǵa kelisine 319 teńgeni (2019 jylǵy qańtarda – 246 teńge), suly jarmasyna – 351 teńgeni (327 teńge), sókke – 375 teńgeni (241 teńge), kúrishke 378 teńgeni (317 teńge) qurady», -delingen komıtet aqparatynda.

Vedomstvo málimetinshe, qumshekerdiń ortasha baǵasy 2020 jylǵy qańtarda kelisine 188 teńgege jetse, 2019 jylǵy qańtarda 240 teńge bolǵan edi.

2020 jylǵy qańtarda et jáne et ónimderinen sıyr etiniń jaýyryn-tós bóligine ortasha baǵa kelisine 1815 teńgeni (2019 jylǵy qańtarda – 1560 teńge), súıegi bar qoı etine – 1719 teńgeni (1464 teńge), súıegi bar jylqy etine – 2039 teńgeni (1766 teńge), shoshqa etiniń jaýyryn bóligine – 1467 teńgeni (1320 teńge), shala ystalǵan shujyqqa – 2172 teńgeni (2030 teńge), taýyqtyń san etine – 833 teńgeni (750 teńge) qurady.