Elimizde azyq-túlik baǵasy bir jylda 10,7% ósti

NUR-CULTAN. QazAqparat - Baǵa azyq-túlik taýarlaryna bir jylda (2020 jylǵy mamyr 2019 jylǵy mamyrǵa) 10,7% ósti. Bul týraly QazAqparat statıstıka komıtetine silteme jasap habarlaıdy.

Nan ónimderi jáne jarmalar, et, balyq jáne teńiz ónimderi, sút ónimderi, jumyrtqa, maı jáne tońmaı, kondıterlik ónimder, jemister, kartop, alkogolsiz sýsyndar jáne alkogoldi ishimdikter qymbattady, al qant, jańa jınalǵan kókónister arzandady.

2020 jylǵy mamyrda jarma ónimderi tobynda qaraqumyq jarmasyna ortasha baǵasy kılogramyna 356 teńge (2019 jylǵy mamyrda – 244 teńge), suly jarmasyna – 364 teńgeni (338 teńge), sók – 370 teńge (307 teńge), kúrish 373 teńge (337 teńge) boldy.

Qumshekerdiń ortasha baǵasy 2020 jylǵy mamyrda kılogramyna 211 teńge bolsa, al 2019 jylǵy mamyrda 245 teńge bolǵan.

2020 jylǵy mamyrda et jáne et ónimderinen sıyr etiniń jaýyryn-tós bóligine ortasha baǵa kılogramyna 1894 teńgeni (2019 jylǵy mamyrda – 1605 teńge), súıegi bar qoı etine – 1871 teńgeni (1548 teńge), súıegi bar jylqy etine – 2166 teńgeni (1827 teńge), shoshqa etiniń jaýyryn bóligine – 1534 teńgeni (1355 teńge), shala ystalǵan shujyqqa – 2220 teńgeni (2079 teńge), taýyqtyń san etine – 849 teńgeni (761 teńge) qurady.