Elimizde azamattyq qorǵanys aılyǵy bastaldy

ASTANA. QazAqparat – Búgin dúnıejúzilik azamattyq qorǵanys kúni. Aıtýly kúnge baılanysty el aýmaǵynda sharalar aılyǵy bastaldy. Ol týraly TJM Azamattyq qorǵanys komıtetiniń tóraǵasy, polkovnık Baýyrjan Syzdyqov aıtyp berdi, dep habarlaıdy QazAqparat tilshisi.

«Azamattyq qorǵanys kúni – qaýipsizdik máselesine jurtshylyqtyń nazaryn aýdarý, tótenshe jaǵdaılardy boldyrmaý jáne bolǵan jaǵdaıda qaýipti jedel joıý maqsatynda jyl saıyn atalyp ótedi. Dúnıejúzilik azamattyq qorǵanys kúnine oraı, bizdiń mınıstrlik naýryz aıy boıy múmkindiginshe barsha halyqty qamtıtyn is-sharalar josparyn bekitti», - dedi Baýyrjan Syzdyqov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, óńirlerde ashyq esik kúnderi, semınarlar, vıktorınalar, konkýrstar, halyqtyń ártúrli sanattarymen, onyń ishinde barlyq deńgeıdegi bilim berý mekemelerinde oqý-jattyǵýlar ótkiziledi.

«Dúnıejúzilik azamattyq qorǵanys kúni jyl saıyn belgili bir uranmen ótedi. Bıylǵy uran: «Táýekelderdi baǵalaýdaǵy aqparattyq tehnologııalardyń róli». Azamattyq qorǵanys – beıbit jáne soǵys ýaqytynda júrgiziletin, tótenshe jaǵdaılardan qorǵaý jónindegi is-sharalardy iske asyrýǵa arnalǵan azamattyq qorǵaýdyń memlekettik júıesiniń quramdas bóligi», - deıdi ol.

Tótenshe jaǵdaılar mınıstrligi usynǵan aqparatqa sáıkes, byltyr elimizde ártúrli sanattaǵy 14 myńnan astam adam azamattyq qorǵanys boıynsha oqytyldy. Sonymen qatar, 83 myńnan astam oqý-jattyǵý ótkizildi.

Sondaı-aq, TJM ókili búgin el aýmaǵynda dabyl júıesi iske qosylatynyn eske saldy.