Elimizde aýrýlardyń aldyn alýǵa baǵyttalǵan mańyzdy jobalar qolǵa alynady – Máýlen Áshimbaev
«Keshe áriptesterimizben birge Ulttyq neırohırýrgııa ortalyǵyna bardyq. Ujymmen kezdesip, Ortalyqtyń jumysymen tanystyq.
Medıtsına qyzmetkerleriniń salamatty ult, sapaly adamı kapıtal qalyptastyrýdaǵy róli zor. Sondyqtan Memleket basshysy Qasym-Jomart Kemeluly Toqaev bul salanyń áleýetin arttyrýǵa únemi basa mán berip keledi.
Prezıdentimizdiń tapsyrmasy boıynsha búginde elimizdegi medıtsına qyzmetkerleriniń jalaqysy turaqty túrde ósip otyr. Keler jyldan bastap dárigerlerdiń eńbekaqysy taǵy 30 paıyzǵa ulǵaıady. Sondaı-aq aldaǵy jyldary medıtsına salasyna bólinetin qarjynyń kólemi artady. Dárigerlerdiń mártebesi zań júzinde aıqyndalady. Aýrýdyń aldyn alýǵa baǵyttalǵan mańyzdy jobalar qolǵa alynady. Senat óz tarapynan osy jáne ózge de bastamalardyń iske asyrylýyna belsendi túrde qatysady»,-dedi Senat tóraǵasy.
Sondaı-aq ol Ulttyq neırohırýrgııa ortalyǵy bilikti ári belgili dáriger, akademık, «Qazaqstannyń Eńbek Eri» Serik Aqsholaqovtyń jetekshiligimen júıeli damyp keletinin aıtty.
«Klınıkada qaterli aýrýlardy emdeýge arnalǵan «Gamma-pyshaq» kesheni men gospıtaldy farmatsııa bólimshesiniń jumysymen tanystyq.
Búginde turǵyndardyń densaýlyǵyna qatysty kórsetkishter boıynsha óńirlerdiń arasynda alshaqtyqtar bar ekeni jasyryn emes. Elimizde adamı kapıtaldyń teń dárejede damýy – mańyzdy mindet. Sondyqtan Ulttyq neırohırýrgııa ortalyǵynyń mol tájirıbesin óńirlermen bólisý jumysyn jalǵastyrǵan jón dep esepteımiz.
Osy rette Ortalyqtyń ujymyna amandyq jáne halyq densaýlyǵyn jaqsartý jolyndaǵy jumystaryna tolaıym tabys tileımiz»,-dedi Máýlen Áshimbaev.
Foto: facebook.com/m.ashimbayev