Elimizde aýaǵa bólinetin zııandy qaldyqtardyń 30 paıyzy Pavlodar oblysyna tıesili - mınıstr

ASTANA. QazAqparat – Respýblıka boıynsha Pavlodar oblysy lastaýshy zattar shyǵaryndylary boıynsha antılıder bolyp sanalady. Bul týraly atalǵan óńirdiń turǵyndarymen kezdesken Ekologııa, geologııa jáne tabıǵı resýrstar mınıstri Serikqalı Brekeshev málim etti, dep habarlaıdy QazAqparat tilshisi.

«Pavlodar óńiri lastaýshy zattar shyǵaryndylary boıynsha antılıder bolyp sanalady. Respýblıka boıynsha zııandy shyǵaryndylardyń jalpy kóleminiń shamamen 30 paıyzy nemese 730 myń tonnasy Pavlodar oblysyna tıesili. Ekologııalyq monıtorıng nátıjeleri boıynsha Pavlodar qalasynyń atmosferalyq aýasynyń lastaný deńgeıi joǵary, al Ekibastuz jáne Aqsý qalalarynda tómen dep sıpattalady. Aýaǵa lastaýshy zattar shyǵaryndylardyń eń kóp kólemi otyn-energetıka kesheni (65,4 paıyz), metallýrgııa (26 paıyz) jáne munaı-hımııa (3,2 paıyz) kásiporyndaryna tıesili. Biz oblystyń ekologııalyq problemalaryna taldaý jasadyq. Nátıjesinde ónerkásiptik kásiporyndardan atmosferalyq aýanyń lastanýy, qaldyqtardy basqarýdyń jetilmegen júıesi jáne eskirgen káriz tazartý qurylǵylary nemese olardyń múldem bolmaǵanyn anyqtadyq», - dedi Serikqalı Brekeshov.

Mınıstrdiń sózinshe, «Jasyl Qazaqstan» ulttyq jobasy aıasynda 5 jyl ishinde Pavlodar oblysyndaǵy 2 iri kásiporynnyń shyǵaryndylaryn 39 myń tonnaǵa qysqartý kózdelgen. Atap aıtqanda, Pavlodar munaı-hımııa zaýytynda 2025 jylǵa deıin aýaǵa bólinetin zııandy qaldyqtar kólemin 34 paıyzǵa, al alıýmınıı zaýytynda 26 paıyzǵa tómendetý josparlanǵan.