Elimizde áskerı joǵary oqý oryndaryna kýrsanttardy qabyldaý bastaldy

ASTANA. QazAqparat - Qazaqstanda áskerı joǵary oqý oryndaryna túsý úshin qujattardy qabyldaý bastaldy. Jyl saıyn oǵan 1 myńǵa jýyq azamat oqýǵa túsedi, dep habarlaıdy QR Qorǵanys mınıstrliginiń baspasóz qyzmeti.

Oqýǵa túsýge qujattardy qabyldaý 15 maýsymǵa deıin jalǵasady. Arnaıy tekserýden ótken, oqýǵa densaýlyq jaǵdaıy boıynsha jaramdy, UBT-nyń tórt páni boıynsha kem degende 50 ball jınaǵan túlekter elimizdiń áskerı joǵary oqý oryndaryna túse alady.

Jyl saıyn elimizdiń áskerı joǵary oqý oryndarynda oqytýdyń jańa baǵdarlamalary qaıta ázirlenip, engizilýde. Endi QR Qorǵanys mınıstrligi áskerı oqý oryndarynyń kýrsanttary shet elderdiń áskerı joǵary oqý oryndarynda oqýyn jalǵastyra alady. Birinshi kýrs aıaqtalǵannan keıin kýrsanttar sheteldegi áskerı oqý oryndaryna oqýǵa irikteý úshin medıtsınalyq kýálandyrýdan ótedi.

Eske slaa ketsek, bıil jańa mamandyqtar engizilgen. Alǵash ret 2016-2017 jyldary Áýe qorǵanysy kúshteriniń Áskerı ınstıtýtynda áskerı-medıtsınalyq fakýltet qurylady.

2016 jyldan bastap Qurlyq áskerleriniń Áskerı ınstıtýty «Áskerı istegi menedjment», «Áskerı istegi logıstıka», «Áskerı istegi ıýrısprýdentsııa» sııaqty mamandyqtar boıynsha kýrsanttardy daıarlaýdy bastaıdy. Radıoelektronıka jáne baılanys Áskerı-ınjenerlik ınstıtýtynda «Áskerı istegi radıoelektronıka men ınjınırıng» mamandyǵy boıynsha daıyndyq bastaldy.

Túlekter atalmysh mamandyqtar boıynsha áskerı qyzmetti aıaqtaǵannan keıin azamattyq salada jumys jasaı alady. «Búginde áskerı bilim qarqyndy damýda. Oqytý sapasy joǵary deńgeıge qoıylǵan. Oqý baǵdarlamasyna áskerı ádep, áskerı istegi kóshbasshylyq pen basqarý stıli. Osy faktorlar kýrsanttardyń jeke tulǵasyn, kóshbasshylyq qasıetteri men minez-qulqyn qalyptastyrady», - dedi QR QM Bilim jáne ǵylym departamentiniń bólim bastyǵy polkovnık Áset Aqkózinov.

Jyl saıyn elimizdiń áskerı oqý oryndarynyń kýrsanttary shetelderde taǵylymdamadan ótip, tájirıbe jınaqtap, ózderiniń biliktilikterin arttyrady. Áskerı joǵary oqý oryndarynyń kýrsanttary úshin bilim alýlaryna barlyq jaǵdaı jasalǵan. Olar tegin meken-jaıda turady, bilim berý tegin, ári áleýmettik jaǵynan tolyq qamtylady. Oqýdy btirgender 100 paıyz jumyspen qamtylyp, áskerı laýazymdarǵa taǵaıyndalady.