Elimizde arnaıy jaǵdaıdy qajet etetin balalardyń sany 170 myńnan asady

NUR-SULTAN. QazAqparat – Elimizde arnaıy jaǵdaı jasaýdy qajet etetin múmkindigi shekteýli balalardyń sany 170 myńnan asady. Bul týraly «Arnaýly jáne ınklıýzıv bilim berýdi damytý ulttyq ǵylymı-tájirıbelik ortalyǵy» RMK basshysy Áıgerim Kúderınova aıtty, dep habarlaıdy QazAqparat tilshisi.

«Búgingi tańda erekshe bilim berýdi qajet etetin balalardyń arasynda arnaýly jaǵdaı jasaýdy qajet etetin múmkindigi shekteýli balalardyń sany 170 myńnan asady. Onyń ishinde erte jastaǵy balanyń sany - 7 myńnan astam, mektepke deıingi balalardyń sany - 54 myńnan astam jáne mektep jasyndaǵy balalardyń sany - 97 myńnan astam, jasóspirimder sany - 14 990. Olardyń ishinde bilim jáne tárbıemen qamtylǵany - 113 994 bala. Bul rette ınklıýzıv bilim berýmen 2 ese bala qamtylǵanyn atap ótý kerek», - dedi ortalyq basshysy Oqý-aǵartý mınıstrliginiń apparat jınalysynda.

Onyń dereginshe, 14 myńnan astam bala jalpy balabaqshalarmen, 9 799 bala arnaýly balabaqshalarmen jáne arnaýly toptarmen qamtylǵan.

«Jalpy bilim beretin mektepterde 44 myńnan astam bala oqıdy. Arnaýly mektepter men arnaýly synyptarda 24 myńnan astam bala bilim alady. Sonymen qatar kolledjderde 2 100 stýdent oqyp jatyr. Al úıde oqıtyn balalardyń sany – 18 327», - dedi Áıgerim Kúderınova.