Elimizde apatty jaǵdaıdaǵy sý qoımalary qaıta jóndelip jatyr - Maǵzum Myrzaǵalıev
«Búginde respýblıkalyq menshikte uzyndyǵy jıyrma 21,5 myń shaqyrymdy quraıtyn 3 298 sýarý jelisi bar. Onyń ishinde 11,9 myń shaqyrym jeliniń jaǵdaıy qanaǵattandyrmaıdy. Osynyń saldarynan fermerlerge sý jetkizýde shyǵyn kóp. Aıta ketý kerek, aýyl sharýashylyǵynda negizgi sý tutynýshy sýarmaly eginshilik salasy bolyp otyr. Osy oraıda Memleket basshysynyń tapsyrmasyna sáıkes biz sýarmaly jer kólemin 2030 jylǵa deıin 1,6 mln gektardan 3,0 mln gektarǵa deıin jetkizýimiz kerek. Bul maqsatta 2019-2020 jyldary 1734 shaqyrymdy quraıtyn kanal jóndelip, 111,5 myń gektar sýarmaly jer aınalymǵa engizildi. Bul óz kezeginde qosymsha 22,3 myń jumys ornyn qurýǵa jáne aýyl sharýashylyǵy óniminiń kólemin jyl saıyn 94,8 mlrd teńgege ulǵaıtýǵa múmkindik berip otyr», - dedi M. Myrzaǵalıev.
Mınıstrliktiń málimetinshe, bıyl 1050 shaqyrym sýarý jelisin qaıta qurý josparlanǵan.
«Bıyl 15 maýsymdaǵy jaǵdaı boıynsha onyń 540 shaqyrymdy oryndaldy. Bul kólemi 78,0 myń gektar sýarmaly jerlerdi aınalymǵa engizýge múmkindik beredi. Bul jyl saıyn 66 mlrd teńgege aýyl sharýashylyǵy ónimderin óndirýge jáne 16 myń turaqty jumys ornyn qurýǵa múmkindik beredi. Sondaı-aq sý shyǵyny 40-tan 17 paıyzǵa deıin tómendeıdi. 2025 jylǵa qaraı sýarmaly jerlerdiń aýdany 2,2 mln gektarǵa deıin jetedi. Sonymen qatar 5 jyl ishinde shamamen 2,5 myń km kanal qaıta jańartylyp, 600 myń gektar jer aınalymǵa engiziledi. Bul aýylda 120 myń jumys ornyn qurýǵa jáne jyl saıyn 510 mlrd teńge somasyna ónim ósirýge yqpal etetin bolady», - deıdi ol.
Odan bólek, mınıstr 41 apatty sý qoımasynyń qaıta qalpyna keltirilip jatqanyn aıtty. Atap aıtqanda, 2017-2019 jyldary 10 nysan paıdalanýǵa berilse, ótken jyly 2 nysan daıyn bolǵan. Al bıyl 8 sý qoımasyn qaıta qalpyna keltirý jumysyn aıaqtaý josparlanýda.
Qalǵan 21 nysan boıynsha vedomstvo basshysy jóndeý jumystarynyń 2025 jylǵa deıin júzege asyrylatynyn jetkizdi.