Elimizde ańshy kýáligin jyl saıyn tirkeý tártibin belgileý usynyldy
«Bárimizge belgili, ańshylardyń kópshiligi ınternet jelisi damymaǵan aýyldyq jerlerde turatyndyqtan «Elektrondyq úkimet» veb-portaly arqyly memlekettik qyzmetti alýǵa múmkindikteri joq. Azamattarǵa ańshy kýáligin berý kezinde týyndaıtyn atalǵan qolaısyzdyqtar is júzinde memlekettik qyzmettiń negizine qaıshy keledi. QR Ekologııa jáne tabıǵı resýrstar mınıstrligi memlekettik kórsetiletin qyzmetter standartynda elektrondyq nysanmen qatar qyzmet alýshynyń qalaýy boıynsha túptelgen qatty qaǵaz túrinde qujat berýdi kózdegen. ıAǵnı ınternet bolmaǵan jaǵdaıdy ańshy qujatty qaǵaz túrinde alýyna bolady», - dedi QR Parlamenti Májilisiniń depýtaty Ámirhan Rahymjanov Májilistiń jalpy otyrysynda depýtattyq saýal jasaı otyryp.
Onyń aıtýynsha, ańshy kýáligin tek elektrondy túrde berý ınternet joq dalalyq jáne taýly jerlerdegi ań aýlaý protsesin baqylaýǵa kedergi keltiredi.
«Qazir ańshylyq sharýashylyǵynyń baqylaýshylary men qoryqshylary ańshy kýáliginiń elektrondyq nysanynyń túpnusqalyǵyn tekserýge arnalǵan arnaıy quraldarmen (planshetter, skanerler) qamtylmaǵan», - deıdi ol.
Sondaı-aq, halyq qalaýlysy aýyldyq eldimekender tolyq ınternetpen qamtylǵansha ańshy kýáligin qaǵaz túrinde berýdi saqtaý kerektigin aıtyp otyr.
«Qoldanystaǵy normalar men júıeler jańa kózqaraspen qaraýdy talap etedi. Osyǵan baılanysty, berilgen ańshy kýálikterin jyl saıyn tirkeý tártibin belgileý qajet dep sanaımyz. Bul jalǵan jáne zańsyz paıdalanylatyn ańshy kýálikterin anyqtaýǵa, bul týraly quqyq qorǵaý organdaryn ýaqtyly habardar etýge múmkindik beredi. Anyqtalǵan málimetter quqyq qorǵaý organdarynyń arnaıy tekserýiniń nysany bolýy múmkin. Sondaı-aq, bul shara azamattar ıelengen jáne ań aýlaýda paıdalanylatyn atys qarýynyń sanyn baqylaýdyń mańyzdy elementteriniń biri. Sonymen qosa respýblıkada ań aýlaý men janýarlar dúnıesin ornyqty paıdalanýdy retteýdiń tıimdi tetigi», - deıdi ol.
Ashyq kózderden alynǵan foto