Elimizde alǵashqy medıtsınalyq kómek kórsetýdiń jańa tetikteri qarastyrylmaq

ASTANA. QazAqparat - Qazaqstanda alǵashqy medıtsınalyq kómek kórsetýdiń jańa mehanızmderin qarastyratyn «Astanalyq deklaratsııa» qabyldanýy múmkin, dep habarlaıdy Habar 24.

Bul týraly Premer-mınıstrdiń orynbasary Erbolat Dosaev Almaty qalasy aktıvimen bolǵan kezdesýde málim etti.

 Qujat 2019 jyldyń 1 qańtarynan bastap iske qosylmaq.

Aldaǵy 3 jylda Joldaýdy júzege asyrýǵa 1 trln 750 mlrd teńgeden astam qarjy jumsalady. Elbasy keler jyldan bastap eń tómengi jalaqyny 42 500 teńgege ulǵaıtýdy tapsyrdy. Ony júzege asyrý úshin jyl saıyn 86 mlrd teńge jáne jergilikti bıýdjetterge ótemaqy tóleýge 10 jarym mlrd teńge bólinetin bolady. Bul Parlament qaraýyna usynylǵan 2019-2020 jyldarǵa arnalǵan respýblıkalyq bıýdjet týraly zań jobasynda qarastyrylǵan.

Sonymen qatar, Joldaýda turǵyn úı máselesi, turaqty jumyspen qamtý, qaýipsizdik, jemqorlyq pen kóleńkeli bızneske qarsy kúres, otandyq óndirýshilerge qoldaý syńdy máseleler qamtylǵan.

«Prezıdent 2019 jyldy jastar jyly dep jarııalady. Almaty qalasynyń jastarmen jumys isteýde oń tájirıbesi bar. Sizderdiń qalalaryńyzda halyqtyń 45 paıyzy - jastar. Ótken jyldan bastap qalada 2020 jylǵa deıin jastardy qoldaýdyń «jol kartasy» iske asyrylýda. Jyl basynan beri 7,5 myń adam nemese ótinish bergenderdiń 65 paıyzy jumysqa ornalasty. Onyń ishinde turaqty oryndarǵa 5,5 myń adam shyqty», - dedi QR Premer-mınıstriniń orynbasary Erbolat Dosaev.