Elimizde alǵash ret aýqymdy tazy men tóbet kórmesi ótti

ASTANA. QazAqparat – Almaty oblysynda tazy men tóbet ıtteriniń kórmesi uıymdastyryldy, dep habarlaıdy QazAqparat tilshisi.

Memleket basshysynyń tapsyrmasy aıasynda «Shopan ata» agroqozǵalysynyń tóraǵasy Almasbek Sadyrbaı jáne Sultan Ibragımovtyń uıymdastyrýymen «Jeti qazyna» tóbet jáne tazy ıt ósirýshiler qaýymdastyǵy quryldy.

Jańadan qurylǵan qaýymdastyqtyń uıytqy bolýymen Almaty oblysy Qarasaı aýdany Shamalǵan aýylynda tazy, tóbet ıtter kórmesi ótti.

Sharanyń maqsaty - tazy men tóbet janashyrlarynyń basyn qosyp, biriktirý, olardyń tuqymyn saqtap qalýmen qatar, ǵylymmen ushtastyrý máselelerin talqylaý jáne osy máselege sala mamandaryn tartý.

Odan bólek, uıymdastyrýshylardyń qazaqtyń tazysy men tóbetin túrkimen alabaıy sııaqty ulttyq brendke aınaldyryp, tazy-tóbet ustaýdy el arasynda keńinen nasıhattaý maqsaty bar.

Qaýymdastyq quryltaıshysy Almasbek Sadyrbaıdyń aıtýynsha, tazy – jeti qazynanyń biri, ultymyzdyń qundylyǵy, baılyǵy.

Onyń tuqymyn saqtap, bolashaq urpaqqa jetkizý - qaýymdastyqtyń basty mıssııasy.

Kórmege Qaraǵandy, Aqmola, ShQO, Abaı, Jambyl oblystarynan jáne Reseıden qonaqtar keldi. Sondaı-aq, sharaǵa tazy men tóbet ósirýshi entýzıastar, sarapshylar men kınologtar qatysty.

Aıta ketsek, Ýkraınanyń Harkov qalasynan kelgen ıt ósirýshi Dmıtrıı Raıhberg, tóbet týraly ǵylymı maqalalar avtory A.Qojahmetov, eks-kınolog Vladımır Vladımırovıch, tazy sarapshysy A.Alpysbaev, S. Ibragımov, P.Penkın, Mahambet Spabekov kórme qonaǵy boldy.

Uıymdastyrýshylardyń málimdeýinshe, Prezıdent tapsyrmasy aıasynda alǵash ret uıymdastyrylǵan kórme joǵary dárejede ótti.

Aldaǵy ýaqytta Astanada ótkizý josparda bar.

Foto: facebook.com/AlmasbekSadyr