Elimizde alǵash ret 3 tilde týrıstik aqparat beretin translıatsııa iske qosyldy

TARAZ. QazAqparat – Taraz qalasynyń «Taraz-Almaty» jáne «Taraz-Shymkent» tasjolyndaǵy kireberisine ornatylǵan 88,8 FM radıotolqynynda qazaq, orys jáne aǵylshyn tilderinde týrıstik aqparat beretin aýdıorolıkter translıatsııasy iske qosyldy, dep habarlaıdy QazAqparat tilshisi.

Joba elimizde alǵash ret oblystyq týrızm basqarmasynyń bastamasymen, «Rýhanı jańǵyrý» baǵdarlamasy jáne Jastar jyly aıasynda júzege asyp otyr. Sonymen qatar, oblystyń týrıstik áleýetin arttyrý maqsatynda «Tsıfrlyq Qazaqstan» baǵdarlamasy negizinde ornatylǵan «Taraz Tour» mobıldik qosymshasy týrıstik nysandar týraly aqparat taratpaq. Bul týraly atalǵan basqarma basshysy Qarlyǵash Aralbekova aıtyp berdi.

«Bul qosymsha týrıster men qonaqtarǵa oblystaǵy negizgi 33 tarıhı-mádenı obekti men qonaq úıler, tamaqtaný oryndary, shıpajaılar jáne demalys oryndary týraly 5 tilde, ıaǵnı qazaq, orys, aǵylshyn, túrik, qytaı tilderinde aqparat alý maqsatynda ázirlendi. Shetelden kelgen týrıster qosymshadaǵy sóıleý sózdigimen jáne ekskýrsııalyq marshrýttardy quryp beretin ınteraktıvti kartany qoldanyp, ár obektide qoıylǵan arnaıy QR-kodtaryn ózderiniń mobıldi telefonyna skanerleý arqyly aýdıogıdti tyńdap, tolyq aqparat tyńdaýǵa múmkindigi bar», - deıdi Qarlyǵash Aralbekova.

Aıta ketý kerek, 88.8 FM týrıstik radıotolqyny Taraz qalasyna kireberisten 4 km radıýsta ustaıdy.