Elimizde áleýmettik mańyzdaǵy ónimdermen qamtamasyz etý deńgeıi qandaı
«2021 jyldyń qorytyndysy boıynsha ishki naryqty azyq-túlik taýarlarymen qamtamasyz etilýine toqtalsaq, ishki naryqty otandyq óndiris esebinen azyq-túlik taýarlarynyń 29 negizgi túrimen (áleýmettik mańyzdaǵy) qamtamasyz etý eskerilgen. 11 taýarlyq pozıtsııa boıynsha 100 paıyz jáne odan astam (kartop, qııar, bıdaı uny, nan, kúrish, makaron, qaraqumyq jarmasy, sút, qoı eti, taýyq jumyrtqasy, tuz) deńgeıde. Azyq-túliktiń 12 túri boıynsha qamtamasyz etý 80 paıyz jáne odan artyq shamada (sábiz, pııaz, qyryqqabat, ashanalyq qyzylsha, burysh, qyzanaq, kúnbaǵys maıy, ashytylǵan sút ónimderi, sary maı, jylqy eti, sıyr eti)», - delingen mınıstrliktiń QazAqparat agenttigine bergen jaýabynda.
Sonymen qatar, 6 taýar boıynsha qamtamasyz etý deńgeıi 80 paıyzdan az bolyp tur. Atap aıtqanda, bul ónimder arasynda alma (74%), qus eti (65,4%), shujyq ónimderi (56,4%), irimshik jáne súzbe (56%), qant (43%), balyq (66%) sııaqty taýarlar bar.
Osy azyq-túlik taýarlarynyń ımportyn almastyrý jáne agroónerkásiptik keshendi turaqty damytý maqsatynda QR Úkimeti Agroónerkásiptik keshendi damytýdyń 2030 jylǵa deıingi tujyrymdamasyn jáne AÓK-di damytýdyń 2025 jylǵa deıingi ulttyq jobasyn iske asyryp jatyr.
Olardyń negizgi mindetteri retinde myna baǵyttar aıqyndalǵan:
- aýyl sharýashylyǵyndaǵy eńbek ónimdiligin 2,5 esege arttyrý;
- azyq-túlik taýarlarynyń negizgi túrleri boıynsha eldiń ózin-ózi qamtamasyz etýine qol jetkizý;
- AÓK ónimderiniń eksportyn onda óńdelgen ónimniń úlesin 70%-ǵa deıin jetkize otyryp, 2 esege ulǵaıtý;
- 7 iri ekojúıeni qalyptastyrý jáne ınvestıtsııalyq jobalardy iske asyrý esebinen 1 mln aýyl turǵynynyń tabysyn turaqty arttyrý.
«Osy mindetterdi sheshý úshin qarjylandyrýdy arttyrýdy, jer qatynastaryn damytýdy jáne salany tsıfrlandyrýdy, agrarlyq ǵylym men bilimdi jetildirýdi, veterınarııalyq ári fıtosanıtarııalyq qaýipsizdikti qamtamasyz etýdi kózdeıtin is-sharalar kesheni júzege asyrylatyn bolady. Bul baǵdarlamalyq qujattarda et, jemis, kókónis, qant, dándi, maıly daqyldar, sút ónimderin óndirýge basymdyq berilgen. Sonmyne qatar, qaıta óńdeýdi qosa alǵanda, iri ınvestıtsııalyq jobalar aınalasynda 7 ekojúıeni qalyptastyrý eskerilgen. Bul qosylǵan quny joǵary túpki qazaqstandyq ónimdi qurýǵa qatysa alatyn keminde 350 myń fermerlik jáne úı sharýashylyqtaryn tartýǵa múmkindik beredi», - dep atalyp ótken vedomstvo málimetinde.
Budan buryn habarlanǵandaı, bıyl Memleket basshysy Úkimettiń keńeıtilgen otyrysynda aýyl sharýashylyǵy salasyna qatysty birqatar máseleni kótergen bolatyn.
Aıta keteıik, Qazaqstan qus eti ımportyna táýeldilikti 35 paıyzǵa deıin tómendetti .