Elimizde AEA-ǵa jer ýchaskelerin berýdiń jańa tetigi engiziledi
Zań jobasynyń negizgi reformalaryna Arnaıy ekonomıkalyq aımaqtar men Indýstrıaldy aımaq qatysýshylaryna jer ýchaskelerin usynýdyń jańa mehanızmin engizý; Indýstrıaldy aımaq qyzmetin quqyqtyq retteý; qyzmettiń basym túrleri tizimine qosymsha qyzmet túrlerin engizý tártibin qaıta qaraý; Arnaıy ekonomıkalyq aımaqtar men Indýstrıaldy aımaqty basqarýshy kompanııalardyń qyzmetin qarjylandyrý múmkindigi; basqarýshy kompanııalarmen maqsatty ındıkatorlardan turatyn damý strategııasyn ázirleý talaptary jatady.
«Basqarýshy kompanııalardan Arnaıy ekonomıkalyq aımaqtar men Indýstrıaldy aımaq qatysýshylaryna jer ýchaskelerin usynýdyń jańa mehanızmi engiziledi. Búginde qoldanystaǵy zańnama normalaryna sáıkes, jer ýchaskesin alý protsesi kúrdeli. Oǵan shamamen 6-9 aı ýaqyt ketedi. Sonyń saldarynan jobalardy iske qosý merzimi sozylady. Investorlar da ýaqyt joǵaltady. Sońynda materıaldyq shyǵynǵa ushyraıdy», - dep toqtaldy QR Investıtsııalar jáne damý mınıstri Jeńis Qasymbek.
Osyǵan baılanysty zań jobasy qatysýshylardyń qysqa merzimde jáne jeńil protsedýralar arqyly jer ýchaskelerin alý tártibin ońtaılandyrýǵa baǵyttalǵan.
Sonymen qatar, qujat aıasynda ruqsat etilgen qyzmet túrlerin anyqtaý tártibi qaıta qaraldy.
«Zań jobasynda AEA-nyń erekshe quqyqtyq rejimi basym qyzmet túrleriniń tizbesin ázirleý men bekitýde ýákiletti organnyń quzyreti keńeıtiledi. Sonymen qatar, bul tizimder Arnaıy komıssııa arqyly ózektendiriledi. Onyń quramyna múddeli memlekettik organdar kiredi. Arnaıy komıssııanyń oń sheshimi negizinde Ekonomıkalyq qyzmettiń jalpy klassıfıkatoryna sáıkes, Arnaıy ekonomıkalyq aımaq úshin ruqsat etilgen qyzmet túrleri tizimin anyqtaý boıynsha Ýákiletti organnyń buıryǵyna ózgertýler engiziledi», - dedi mınıstr.
Indýstrııalyq aımaqtardyń qyzmetin retteý máselesine toqtalǵan J. Qasymbek «Indýstrııalyq aımaq qyzmeti Kásipkerlik Kodekste bekitilgen jáne onda tek túsinik berilgen. Sondaı-aq, «Bıznestiń jol kartasy-2020» baǵdarlamasynda Indýstrıaldy aımaqtardy qarjylandyrý tetigi belgilengen. Budan bólek, ınfraqurylym qurylysy saıasatyna, qarjylandyrýǵa jaýap beretin biryńǵaı memlekettik organ joq. Osyǵan baılanysty, zań jobasynda Indýstrııalyq aımaqtardyń jáne olardy basqarýshy kompanııalardyń qyzmeti retteldi. Sonymen qatar, QR Investıtsııalar jáne damý mınıstrligi Indýstrııaldy aımaq qyzmetin retteıtin ýákiletti organ retinde belgilendi», - dedi.
Belgili bolǵandaı, zań jobasynda Indýstrııalyq aımaqtar respýblıkalyq jáne óńirlik mańyzdaǵy, shaǵyn jáne jeke ındýstrııalyq aımaqtar bolyp bólindi. Respýblıkalyq jáne óńirlik mańyzdaǵy Indýstrıaldy aımaqtar jergilikti atqarýshy organnyń sheshimimen qurylatyn bolady. Zańnamaǵa sáıkes, jeke Indýstrııalyq aımaqtardy zańdy nemese jeke tulǵalar óz qarajattary esebinen qura alady. Olar Indýstrııalyq aımaq qurý tujyrymdamasyn jergilikti atqarýshy organmen kelisetin bolady.
«Zań jobasyn qabyldaý Arnaıy ekoknomıkalyq aımaqtar men Indýstrıaldy aımaqtardyń jumysyn jandandyrýǵa, 2022-shi jylǵa deıin qosymsha 10 myń jumys ornyn ashýǵa jáne 150-den astam jańa jobalardy iske qosýǵa múmkindik beredi», - dedi Jeńis Qasymbek.