Elimizde 90 memqyzmetti onlaın tártipte alýǵa bolady

ASTANA. QazAqparat - HHІ ǵasyr - tórtkúl dúnıeniń jańalyǵyn tórt burysh smartfonǵa syıǵyzǵan zaman. Álemdik úrdiske ilesken eldiń ozary haq. Osy qaǵıdat boıynsha «Azamattarǵa arnalǵan úkimet» memlekettik korporatsııasy halyqtyń tsıfrlyq saýatyn arttyrý boıynsha jumystaryn jalǵastyrýda, dep habarlaıdy QazAqparat tilshisi.

Búginde azamattarǵa elektrondy úkimet portaly arqyly memlekettik qyzmetterdi alýdy oqytatyn tsıfrlyq HQO elimizdiń barlyq oblysynda ashylǵan. Buǵan qosa halyqqa qyzmet kórsetý ortalyqtarynda smartfon arqyly memlekettik qyzmetterdi alýdy úıretetin oryndar da ashylyp jatyr.

«HQO mamandary qyzmet alýshylardyń telefondaryna telegram men Mgov qosymshalaryn ornatyp berýge kómektesip, túrli anyqtamalar men qyzmetterdi alý retin túsindirip berýde. Búgin de Telegram qosymshasyndaǵy Egovkzbot arqyly 24 qyzmet qoljetimdi. Júıe iske qosylǵan segiz aıdyń ishinde 140 myń adam ony qoldanyp úlgerip, 160 myń ret túrli anyqtamaǵa ótinish bergen. Messendjer qoldanýshylary 60 myń ret mekenjaı, 20 myń ret sottylyqtyń bolý/bolmaýy týraly anyqtamalardy suratqan. Óz kezeginde, Mgov qosymshasy arqyly 90 memlekettik qyzmetti onlaın tártipte alýǵa bolady. Smartfon ıeleri bul qosymshany byltyr 1,3 mln ret júktep, 3,6 mln qyzmet alǵan», - delingen «Azamattarǵa arnalǵan úkimet» KEAQ baspasóz qyzmetinde.

Onlaın bolý - zaman talaby. Qaltańyzdaǵy smartfon halyqqa qyzmet kórsetý ortalyqtaryna barmaı-aq, suranysqa ıe memlekettik qyzmetterdi jyldam alýǵa kómektesedi.

«Kórsetiletin elektrondyq qyzmetter sanynyń artýyna baılanysty memlekettik korporatsııa halyq arasynda qyzmetterdi onlaın alýdy úıretetin sharalar ótkizip, azamattardyń tsıfrlyq saýattylyǵyn arttyrýda. Bul qosymshalardy paıdalaný úshin mobıldi azamattar bazasynda tirkelý mindetti. Ony HQO qyzmetkerleri júzege asyrady. Tártip boıynsha qyzmet alýshynyń jeke sáıkestendirý nómiri men uıaly telefony baılanystyrylyp, bazaǵa engizilýi tıis», - deıdi «Azamattarǵa arnalǵan úkimet» memlekettik korporatsııasynyń basqarma tóraǵasy Abylaıhan Ospanov.

Aıta keteıik, osy ýaqytqa deıin elektrondy úkimet portalyn óz betinshe paıdalaný daǵdylaryn 8 mıllıon qazaqstandyq ıgergen. Oǵan qosa, memlekettik korporatsııa mamandary jergilikti ákimdikterdiń 3,5 qyzmetkerine egov.kz portalyn paıdalanýdy úıretip, olar ózge 686 myń azamatty oqytqan.

Budan bólek, memlekettik korporatsııa qyzmetkerleri apta saıyn emhana, áskerı bólim, joǵary oqý oryndary men ózge de mekemelerge baryp, qosymshalardy paıdalaný retin úıretip otyrady.