Elimizde 9 aıda eńbek zańnamasy 8 myń ret buzylǵan - Tólegen Ospanqulov

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Bas memlekettik eńbek ınspektory Tólegen Ospanqulov eńbek zańnamasyn buzýdyń resmı statıstıkasyn atady, dep habarlaıdy QazAqparat tilshisi.

«Bıylǵy jyldyń 9 aıynda memlekettik eńbek ınspektorlary 8 myńnan astam zańsyzdyqty anyqtady. Olardyń 30%-y eńbek qaýipsizdigi jáne eńbekti qorǵaý salasyna tıesili, Atap aıtqanda, qaýipsiz eńbek jaǵdaılarymen qamtamasyz etpeý (695 nemese 27%); jumyskerlerdi eńbek qaýipsizdigi boıynsha oqytý men nusqamalyqty ótkizbeý (361 nemese 14%); jeke jáne ujymdyq qorǵaý quraldarymen, arnaıy kıimmen jáne arnaıy aıaq kıimmen qamtamasyz etpeý (142 nemese 5,6%); eńbekti qorǵaý boıynsha qyzmettiń nemese jaýapty tulǵanyń bolmaýy (54 nemese 2,1%)», - dedi Bas memlekettik eńbek ınspektory.

Tólegen Ospanqulovtyń málimeti boıynsha, osy zańsyzdyqtarǵa jol bergen jumys berýshilerge 2,7 myńnan astam uıǵarym berilip, 189 mln teńge somasyna 1 myńnan astam aıyppul salynǵan.

«Quqyq buzýshylyqqa kináli laýazymdy tulǵalardyń jaýapkershiligin qaraý úshin quqyq qorǵaý organdaryna 777 materıal jiberilip, olar boıynsha 102 qylmystyq is qozǵaldy», – dedi Tólegen Ospanqulov.