Elimizde 854 mektepte aýladaǵy dárethana máselesi sheshilmeı tur
Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń 30-shy otyrysynda osyndaı málimet aıtty. Áýeli ol eldegi bilim oshaqtarynyń beınekameralarmen jabdyqtalýyna toqtaldy.
«2020 jyldyń sońynda respýblıkamyzdyń 1602 mektebinde birlesken buıryqtyń talaptaryna sáıkes kelmegen 83 mektepte kemshilik joıyldy. Degenmen, áli de 1519 mekteptiń máselesi sheshilmeı otyr. Onyń ishinde Túrkistan oblysynda 687 mektep, Almaty oblysynda 427, Almaty qalasynda 205 mektepte kemshilikter saqtalýda. Bul statıstıka osy óńirlerdegi bilim uıymdardaǵy beınekameralar atalǵan buıryq talaptaryna sáıkes kelmeıtinin kórsetedi», - komıtet basshysy.
Onyń sózine qaraǵanda, eldegi mektepterdiń basym bóliginde jyly dárethanalar ornatylǵanymen, aýladaǵy dárethanany paıdalaný tyıylmaı tur.
«2020 jyldyń basynda elimizdiń orta bilim berý uıymdarynda 2700 aýla dárethanasy bolǵan. 2021 jyldyń basynda olardyń sany 148-ge deıin azaıdy. 2021 jyldyń І toqsanynda taǵy 13 jyly dárethana ornatyldy. Onyń 12-si Túrkistan oblysynda, bireýi Almaty oblysynda salyndy. Áli de 135 mektepte aýla dárethanasy jumys istep tur. Olardyń 98-inde 2021 jyly jyly dárethana ornatý josparlanǵan. Respýblıkanyń 37 mektebinde jyly dárethana ornatý jumystary júrgizilmeı jatyr», - degen Gúlzat Kóbenova máselege qyryn qarap otyrǵan óńirlerdi atady.
ıAǵnı, Almaty oblysynyń Jambyl, Qarasaı, Kóksý, Panfılov, Talǵar, Eńbekshi qazaq aýdandaryndaǵy 18 mektepte jyly dárethanalar qashan ornatylatyny belgisiz. Shyǵys Qazaqstan oblysynyń Tarbaǵataı jáne Altaı aýdandarynda, Batys Qazaqstan oblysynyń Qaztalov, Jańaqala aýdandarynda, Qaraǵandy oblysynyń Shet aýdanynda da osyndaı problema bar.
«Barlyǵy 2631 mektepte jyly dárethanalarmen qatar aýla dárethanalary da jumys istep tur. Olardyń ishinde búgingi kúni 1381 mektepte syrtqy dárethanalar tolyq joıyldy. Taǵy 396 mektepte aýla dárethanasyn joıý jsoparlanǵan. Degenmen, 854 mektepte bul másele áli sheshilmegen. Jergilikti atqarýshy organdarǵa bul máselege taǵy nazar aýdarý qajet», - dedi mınıstrlik ókili.
Bilim jáne ǵylym salasyndaǵy baqylaý komıtetiniń tóraıymy balabaqshalarada da jyly dárethana problemasy bar ekenin eske saldy.
«Túrkistan oblysynda 4-5 jastaǵy balalary aýladaǵy dárethanaǵa baratyn 199 uıym bar eken. Ákimdik bul máselei búginge deıin sheshpeı otyr», - dedi Gúlzat Kóbenova.