Elimizde 70 myń tonna pııaz qory bar – Erbol Qarashókeev

ASTANA. QazAqparat – Elimizde pııazdyń baǵasy turaqtaldy, jaǵdaı baqylaýda. Bul týraly Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Ótken jyly 1,2 mln tonna pııaz jınaldy. Onyń 1 mln tonnasy Jambyl oblysynda óndirildi. Bizde pııazdy tutyný kólemi 300 myń tonnany quraıdy. Pııazdy eksporttaý múmkindigimiz bar, degenmen bastysy ishki naryq suranysyn óteý bolyp otyr. Pııazǵa qatysty jaǵdaı turaqtaldy. Búginde elimizde 70 myń tonna pııaz qory bar, onyń 30 myń tonnasy Jambyl oblysynda», - dedi Erbol Qarashókeev Úkimet úıiniń kýlýarynda BAQ ókilderiniń saýalyna jaýap bere turyp.

Sondaı-aq, mınıstr pııaz birneshe óńirdegi pııaz baǵasyna toqtalyp ótti.

«Jambyl oblysynda pııaz 200 teńge turady, al Astanada 260-300 teńge shamasynda. Dúkenderde 300-360 teńge arasynda. Pııazdyń quny onyń bastapqy satyp alynǵan baǵasyna da baılanysty. Baǵa turaqtaldy, jaǵdaı baqylaýda. Onyń ústine pııazdy eksporttaýǵa ýaqytsha tyıym salyndy. Qysqasy, pııazsyz qalmaımyz», - deıdi ol.

Eske salsaq, buǵan deıin Erbol Qarashókeev pııaz baǵasynyń ósýin túsindirgen edi.