Elimizde 670-ten astam temirjol ýchaskesin sý basý qaýpi bar

NUR-SULTAN. QazAqparat – Elimizde 670-ten astam temirjol jáne 482 avtomobıl joly ýchaskesin sý basý qaýpi bar. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Memlekettik organdar sý tasqyny jaǵdaıyn boljaý úshin Qazaqstan aýmaǵyna tóngen tabıǵı qaýipter men apatty qubylystar týraly daýyldy eskertýlerdi uıymdastyrýda resmı aqparattyq qyzmet kórsetý quqyǵy bar, jalǵyz jaýapty organ sanalatyn «Qazgıdromet» RMK málimetterin paıdalanady. Buǵan qosa, memlekettik organdar Jaıyq, Syrdarııa, Talas, Shý transshekaralyq ózenderiniń sý tasqyny jaǵdaıyna boljam jasaý úshin Reseı, Ózbekstan jáne Qyrǵyzstannyń gıdrometeorologııalyq qyzmetteriniń boljamdy málimetterin paıdalanady», - dedi Úkimet basshysy.

Onyń atap ótýinshe, «Qazgıdromet» málimetterine sáıkes, osy jyldyń 11 naýryzynda Soltústik Qazaqstan, Aqmola, Aqtóbe, Qostanaı, Batys Qazaqstan, Qaraǵandy oblystaryndaǵy ózen basseınderindegi ylǵaldylyq kólemi ortasha kópjyldyq mánnen joǵary bolyp otyr. Sonymen qatar Aqmola, Batys Qazaqstan, Qaraǵandy, Qostanaı jáne Soltústik Qazaqstan oblystarynda jer tońynyń qalyńdyǵy da ótken jylǵy kórsetkishten joǵary.

«Buǵan qosa, atalǵan óńirlerde qar jınalý protsesi jalǵasyp jatyr. Osylaısha, aýa temperatýrasy kúrt jylynyp, qar erıtin bolsa, onda 276 eldi mekendi (270 myńnan astam adam turady), avtomobıl joldarynyń 482 ýchaskesin, temirjoldyń 673 ýchaskesin, 59 avtomobıl kópirin sý basý qateri bar», - dedi Asqar Mamın.