Elimizde 664 mektepte ǵana ınternet jyldamdyǵy HEBO usynymdaryna saı
«Búgingi tańda elimizdiń 7 098 memlekettik mektebiniń ishinde 7 078 mektep ınternet jelisine ártúrli tehnologııalarmen qosylǵan. Onyń ishinde talshyqty-optıkalyq baılanys jelileri, jerseriktik tehnologııalar, radıo-relelik jeli, sondaı-aq ADSL tehnologııasy bar. 664 mektepte ınternet jyldamdyǵy Halyqaralyq elektr baılanysy odaǵynyń usynymdaryna sáıkes keledi. 6 414 mektepte Internet jyldamdyǵyn Halyqaralyq elektorbaılanys odaǵynyń usynymdary deńgeıine jetkizý qajet», - dedi ol.
Vıtse-mınıstrdiń atap ótýinshe, Halyqaralyq elektr baılanysy odaǵy bir mektepke keminde sekýndyna 20 Megabıt jyldamdyqty usynady. Bul jaǵdaıda júktep alý jyldamdyǵy keminde sekýndyna 20 Megabıt, al júkteý jyldamdyǵy sekýndyna 5 Megabıt bolýy tıis. Al oqýshylar sany 400-den asatyn mektepter úshin qosymsha árbir 20 oqýshyǵa keminde sekýndyna 1 Megabıt jyldamdyq usynylýy qajet.
«2 833 mektepte ınternetke qol jetkizý jyldamdyǵyn Halyqaralyq elektr baılanysy odaǵy usynymy deńgeıine deıin arttyrý úshin tehnıkalyq múmkindik bar. Bul úshin jyl saıyn shamamen 10 mlrd teńge kerek. Qazirgi ýaqytta barlyq mekteptegi ınternet jelisine qoljetimdiligin qamtamasyz etý úshin tólenetin qarajat kólemi 6,5 mlrd teńgeni quraıdy. Joǵaryda aıtylǵandardy eskere otyryp, jergilikti atqarýshy organdarǵa mektepterde ınternet jyldamdyǵyn arttyrý úshin qajetti qarajat bólýdi qamtamasyz etýdi tapsyrýdy maqsatqa saı dep esepteımiz», - dedi Ashat Orazbek.