Elimizde 66 naýqas balanyń búıregi men júregin almastyrý qajet

NUR-SULTAN. QazAqparat - Ulttyq ǵylymı onkologııa ortalyǵynda transplantatsııanyń jańa biregeı tehnologııasy engizildi, dep habarlaıdy QazAqparat.

Ortalyq bazasynda alǵash ret transplantolog-hırýrgtar týystyq donordan búırek transplantatsııasyn sátti oryndady.

Bul – AV0 sáıkes kelmeıtin búırek transplantatsııasy álemniń keıbir elderinde jasalady, biraq sırek.

Búırek transplantatsııasy - sozylmaly búırek jetkiliksizdiginiń termınaldyq satysy bar patsıentter úshin búırekti almastyratyn terapııanyń ońtaıly ádisi.

Alaıda emdeýdiń osy ádisi búkil elderde qolda bar donorlyq organdardyń tapshylyǵynan aıtarlyqtaı shektelgen.

Tiri donordan búırek almastyrý - máseleni jeńýdiń naqty joldarynyń biri.

10 tamyzdaǵy jaǵdaı boıynsha Qazaqstanda 3 566 patsıent organyn transplantatsııalaýǵa muqtaj. Onyń ishinde 77 bala bar.

Aǵza almastyrýǵa muqtajdar sany:

- búırekke - 3 154 eresek adam, 60 bala;

- baýyrǵa - 169 eresek, 8 bala;

- ókpege muqtaj 17 eresek adam bar;

- 147 eresek adamǵa, 6 balaǵa júrek kerek;

- 2 eresek adamǵa, 3 balaǵa «júrek-ókpe» birge qajet.

Birneshe saǵatqa sozylǵan operatsııa barysynda 35 jastaǵy naýqasqa donorlyq organ sátti transplantatsııalandy.

Sh. esimdi naýqas «besinshi satydaǵy sozylmaly búırek aýrýy» dıagnozymen kelip tústi, eki jyl boıy baǵdarlamalyq gemodıalızde boldy.

Bul retsıpıentte qan tobyna sáıkes kelmeıtin donor boldy. Desensıbılızatsııalaýshy em júrgizgennen keıin patsıentke týystyq donordan búırek transplantatsııasy jasaldy.

«Donor-retsıpıenttiń» jaı-kúıi jasalǵan operatsııanyń ýaqyty men aýyrlyǵyna sáıkes keledi, birqalypty. Qazir olar belsendi, tósekten turyp, ary-beri júre alady.

Búgingi tańda retsıpıent úıine shyǵaryldy, fýnktsııalaryn qalpyna keltirý úshin transplantatsııalanǵan organdardyń belsendi terapııasy jalǵasyp jatyr.

Bul tehnologııa ortalyqtyń organdardy transplantatsııalaý bólimshesinde ári qaraı damı beredi.