Elimizde 650 belsendi eksporttaýshy bar

ASTANA. QazAqparat – Elimizde 650 belsendi eksporttaýshy bar. Bul týraly Saýda jáne ıntegratsııa vıtse-mınıstri Qaırat Tórebaev málim etti, dep habarlaıdy QazAqparat tilshisi.

«Eń aldymen qoldaǵy derekterge sáıkes, ótken jyldyń qorytyndysynda Qazaqstanda keminde úsh jyl boıy eksporttaýmen aınalysyp kele jatqan 650 belsendi eksporttaýshy bar ekendigin atap ótken jón. Olardyń shamamen 80 paıyzy – bul shaǵyn jáne orta bıznes ókilderi jáne 48 paıyzy azyq-túlik ónimderin eksporttaýshylar», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.

Sonymen qatar onyń dereginshe, ótken jyly 463 kásiporyn qarjylyq emes is-sharalardy paıdalandy.

«Olar Akseleratsııa, marketpleısterge shyǵarý, saýda mıssııasy jáne eksporttyq shyǵyndardyń bir bóligin qaıtarý syndy is-sharalar. Eger, keri baılanys jaıynda aıtar bolsaq, biz túbegeli ashyq bolyp qaldyq. Tek ótken jyly ǵana eksporttaýshylardń shamamen 3,4 myń suranystary qaraldy», - dedi vıtse-mınıstr.

Qaırat Tórebaevtyń atap ótýinshe, árbir salynǵan bıýdjet teńgesiniń qaıtarymy marketpleısterde 213 teńgeni, servıstik is-sharalarda 652 teńgeni, Aksseleratsııa baǵdarlamasy boıynsha 158 teńgeni qurady.