Elimizde 62 myńnan astam jetim bala baspana kezeginde tur
«Sońǵy 10 jylda 8 458 jetim jáne ata-anasynyń qamqorlyǵynsyz qalǵan bala baspana aldy. 2022 jyly 673 jetim jáne ata-anasynyń qamqorlyǵynsyz qalǵan bala baspanaly boldy. 2023 jyldyń 1 mamyryndaǵy jaǵdaı boıynsha baspana alý kezeginde 62 501 jetim jáne ata-anasynyń qamqorlyǵynsyz qalǵan bala tur», - dep atap ótedi Úkimet basshysy jaýabynda.
Onyń dereginshe, jetim jáne ata-anasynyń qamqorlyǵynsyz qalǵan balalardy baspanamen qamtamasyz etý maqsatynda jergilikti atqarýshy organdar atalǵan sanattaǵy balalardy qoldaý jónindegi keshendi jospardy júzege asyryp jatyr. Onda bıýdjetten tys jáne demeýshilik qarajat esebinen balalardy pátermen qamtamasyz etý is-sharalary kózdelgen.
«Munan bólek, jetim jáne ata-anasynyń qamqorlyǵynsyz qalǵan balalarǵa arnalǵan bilim berý uıymdarynyń tárbıelenýshilerine «Otbasy bank» AQ-da depozıttik esepshot ashylǵan. Ol balalardyń asyraýshysynan aırylýyna, múgedektigine baılanysty járdemaqylar, alıment esebinen, sonymen qatar áleýettik seriktesterdiń, bıznes qurylymdardyń qarajat aýdarýy arqyly tolyqtyrylyp otyrady», - deıdi Álıhan Smaıylov.