Elimizde 60 jastan asqan qansha azamat jumys isteıdi

ASTANA. QazAqparat – Bıylǵy jyldyń basynda Qazaqstanda 60 jáne odan joǵary jastaǵy halyq sany 2 909 666 adamdy (eldiń jalpy sanynyń 14,2%) qurady, onyń ishinde 1 167 732 adam (40,1%) – erler jáne 1 741 934 adam (59,9%) – áıelder, dep habarlaıdy QazAqparat.

QR Strategııalyq josparlaý jáne reformalar agenttigi Ulttyq statıstıka bıýrosynan málim etkendeı, egde jastaǵy halyqtyń eń kóp sany Qostanaı oblysynda (314 592 adam), Qaraǵandy oblysynda (222 511 adam), Túrkistan oblysynda (215 088 adam) jáne Almaty oblysynda (197 270 adam) turady.

Byltyr 60 jáne odan joǵary jastaǵy jumyspen qamtylǵan halyq sany 393,5 myń adamdy qurady, onyń 56,3% - erler jáne 43,7 % - áıelder. 2020 jylmen salystyrǵanda 60-64 jas aralyǵyndaǵy jumyspen qamtylǵan halyq sany 12,3% artty. Bul rette osy jas tobyndaǵy áıelder boıynsha ósim 32% boldy.

Sondaı-aq Ulttyq statıstıka bıýrosy zeınet jasyndaǵy professor-oqytýshylar quramynyń sany boıynsha málimet usyndy. Oǵan sáıkes, 2021-2022 oqý jylynyń basynda JOO men joǵary oqý orynanan keıingi bilim berý oryndaryndaǵy 63 jáne odan joǵary jastaǵy erler sany 2 889 adamdy, 58 jastan asqan áıelder sany 3 953 adamdy qurady. Onyń ishinde magıstrdiń akademııalyq dárejesi barlar – 291 adam, fılosofııa doktorlary – 150 adam, beıini boıynsha doktor – 55 adam, ǵylym doktory – 1 556 adam, ǵylym kandıdaty – 3 445 adam, professor – 1 386 adam jáne dotsent – 2 141 adam.