Elimizde 60 myń patsıentke jetetin dárilik zattardyń 2 aılyq qory bar - DSM

NUR-SULTAN. QazAqparat – Elimizde 60 myń patsıent úshin dárilik zattyń 38 ataýy boıynsha 2 aılyq tolyqtyrylatyn qor bar. Bul týraly búgin Úkimet otyrysynda QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Dárilik zattar men medıtsınalyq buıymdardyń qorlaryn qurý jóninde is-sharalar basty qadaǵalaýda. Birinshi, biryńǵaı dıstrıbıýtordyń qoımalarynda 60 myń patsıent úshin dárilik zattyń 38 ataýy boıynsha 2 aılyq tolyqtyrylatyn qor bar. Ekinshi, medıtsınalyq uıymdarda 7 mlrd teńgege dárilik zattyń 91 ataýy boıynsha 1 aılyq qor qamtamasyz etildi. Úshinshi, ambýlatorııalyq deńgeıde koronavırýs ınfektsııasymen aýyratyn patsıentter 5 dárilik preparatpen qamtamasyz etiledi, 500 myń patsıentti emdeý úshin preparattar qarastyrylǵan», - dedi Ajar Ǵınııat.

Tórtinshiden, mınıstr biryńǵaı dıstrıbıýtordyń qoımalarynda bólshek saýda jelisiniń ınterventsııasy úshin qajet bolǵan jaǵdaıda jalpy somasy 1,8 mlrd teńgege 26 dárilik zat boıynsha 2 aılyq qor jasalǵanyn atap ótti. Besinshiden, óńirlerde asa qajet bolǵan jaǵdaıda dárihanalar arqyly ótkizý úshin 10 mln maska (onyń ishinde balalarǵa arnalǵan 500 myń maska) satyp alynǵanyn aıtty.

«200 myń jeke qorǵanysh quralynyń, 10 mln bir ret qoldanylatyn qolǵaptyń qory quryldy. Osylaısha, qolda bar qorlardy eskere otyryp, dárilik preparattarmen qamtamasyz etý ýaqtyly júzege asyrylatyn bolady», - dedi ol.