Elimizde 434 myń adam mıkroqarjy uıymdaryna qaryzyn óteı almaı júr

ASTANA. QazAqparat – Elimizde problemaly qaryz alýshylar sany 434 myń adamnan asyp ketti. Bul týraly Májilis depýtattarynyń saýalyna QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanovtyń jaýabynda aıtylǵan, dep habarlaıdy QazAqparat tilshisi.

«2022 jylǵy 1 qyrkúıektegi jaǵdaı boıynsha mıkroqarjy uıymdarynyń kepilsiz tutynýshylyq mıkrokredıtteriniń kólemi 416 mlrd teńgeni qurady. Mıkroqarjy uıymdarynan kepilsiz tutynýshylyq mıkrokredıtter boıynsha qaryz alýshylar sany 1 343,6 myń adamǵa jetti. Osy jyldyń 8 aıynda kepilsiz tutynýshylyq mıkrokredıtter qurylymynda «Memlekettik kredıttik bıýro» AQ derekteri boıynsha merzimi 90 kúnnen asatyn qaryzdardyń úlesi 18,8 paıyzǵa ósip, 71,3 mlrd teńgege jetti. Problemaly qaryz alýshylar sany 434,2 myń adamdy (biregeı qaryz alýshylar) qurady», - dedi ol.

Onyń atap ótýinshe, problemaly kepilsiz tutynýshylyq mıkrokredıtterdiń aıtarlyqtaı ósýi onlaın mıkrokredıtteý segmentine tıesili bolyp tur.

«Aıtalyq, 50 AEK-ke deıingi kepilsiz onlaın mıkrokredıtter boıynsha problemaly qaryz alýshylardyń sany 15,8 paıyzǵa artyp 380 myń adamǵa jetti. Bul mıkroqarjy uıymdaryndaǵy problemaly qaryz alýshylardyń jalpy sanynyń 88 paıyzyn quraıdy. Onlaın mıkrokredıtter boıynsha merzimi ótken bereshek 40 mlrd teńge boldy. Qazirgi ýaqytta mıkroqarjylandyrý sektorynda 230 mıkroqarjy uıymy qyzmet kórsetedi. Onyń ishinde 30 kompanııa onlaın mıkrokredıtteý segmentinde jumys isteıdi», - dedi Nurlan Ábdirahmanov.