Elimizde 400-den astam bala koronavırýspen aýyryp jatyr

NUR-SULTAN. QazAqparat – Koronavırýs juqtyrǵan 3 bala reanımatsııada emdelip jatyr. QR Densaýlyq saqtaý mınıstri Ajar Ǵınııat Ortalyq kommýnıkatsııalar qyzmetinde ótken brıfıngide osyndaı derek keltirdi, dep habarlaıdy QazAqparat tilshisi.

«Jyl basynan beri koronavırýspen 6 myńnan astam bala aýyrdy. Qazirgi tańda aýrýhanalarda 423 bala emdelip jatyr. Árbir balanyń densaýlyǵyn mınıstrliktiń deńgeıinde qarap otyramyz. Jedel shtabymyz bar ekenin, balalardyń densaýlyǵy únemi qaralyp otyratynyn aıtqan bolatynmyn», - dedi vedomstvo basshysy.

Sondaı-aq, ol atalǵan balalardyń syrqatty qalaı ótkerip jatqanyna toqtaldy.

«Qazir aýyryp jatqan balalardyń 21 paıyzy jeńil, 77 paıyzy ortasha, 0,7 paıyzy aýyr ótkerip jatyr. ıAǵnı, qazir 3 bala reanımatsııada jatyr. Ol balalardyń densaýlyǵyn dárigerler, sonyń ishinde respýblıkalyq deńgeıdegi mamandar emdeýge aralasyp otyr», dedi mınıstr.

Mınıstrlik málimetine súıensek, keıingi eki jylda Qazaqstanda zańsyz dári aınalymynyń 700 deregi tirkelgen.

«Densaýlyq saqtaý mınıstrligi dárilik zattardyń zańsyz aınalymyn baqylaý aıasynda udaıy monıtorıng júrgizip otyrady. Keıingi eki jylda ondaı zań buzýdyń 700-deı jaǵdaıy tirkeldi. Dárilik zattardy zańsyz satqany úshin 80 mln teńgeden astam aıyppul salyndy. Bıyl 2 jaǵdaı tirkelip, 2 qylmystyq is qozǵaldy», - dedi Ajar Ǵınııat.