Elimizde 36 myńnan astam mádenıet jáne óner qyzmetkeriniń jalaqysy ósti

NUR-SULTAN. QazAqparat – Qazaqstanda 2020 jyldan bastap 36 myńnan astam mádenıet jáne óner qyzmetkeriniń jalaqysy ósti. Bul týraly elordada ótip jatqan Mádenıet jáne sport mınıstrliginiń alqa májilisinde mınıstr Aqtoty Raıymqulova málim etti, dep habarlaıdy QazAqparat tilshisi.

«Mádenıet jáne sport qyzmetkerleriniń ál-aýqatyn arttyrý - bizdiń jumysymyzdyń mańyzdy aspektileriniń biri. Memleket basshysynyń Joldaýyn iske asyrý sheńberinde 2020 jyldyń 1 qańtarynan bastap mádenıet jáne óner uıymdary qyzmetkerleriniń jalaqysy respýblıkalyq deńgeıde 50 paıyzǵa deıin, óńirlerde 35 paıyzǵa deıin ósti. Jalpy, shamamen 36,4 myń adamnyń, onyń ishinde respýblıkalyq deńgeıde 3 myńǵa jýyq, óńirlerde 31 myńnan astam adamnyń jalaqysy ósti», - dedi Aqtoty Raıymqulova.

Mınıstrdiń aıtýynsha, 2020 jyldyń 1 qańtarynan bastap dene shynyqtyrý jáne sport salasy qyzmetkerleriniń jalaqysy jyl saıyn 2023 jylǵa deıin 25 paıyzǵa ulǵaıady (2020 jyly – 25 paıyz, 2021 jyly – 50 paıyz, 2022 jyly-75 paıyz, 2023 jyly-100 paıyzǵa).

«Negizinen jattyqtyrýshy-oqytýshylardyń, muǵalimderdiń, 4 mektep-ınternat-kolledjderi men sport kolledji tárbıeshileriniń, balalar-jasóspirimder sport mektebiniń jattyqtyrýshy-oqytýshylarynyń jalaqysy kóteriledi. Budan basqa sportshylardyń dopıngke qarsy zerthanasynyń, Ulttyq dopıngke qarsy ortalyqtyń qyzmetkerlerine, dene shynyqtyrý jáne sport jónindegi Respýblıkalyq oqý-ádistemelik jáne taldaý ortalyǵynyń qyzmetkerlerine, Sportty damytý dırektsııasynyń qyzmetkerleri men jattyqtyrýshylaryna laýazymdyq jalaqynyń 100 paıyz mólsherinde jańa qosymsha aqylar belgilendi. Osylaısha, olardyń jalaqysy 2 ese ósti», - dedi ol.