Elimizde 3,5 myńnan astam qoqys polıgony bar - mınıstr

NUR-SULTAN. QazAqparat - QR Ekologııa, geologııa jáne tabıǵı resýrstar mınıstri Maǵzum Myrzaǵalıev eldegi qoqys polıgondarynyń jaı-kúıin aıtyp berdi, dep habarlaıdy QazAqparat.

«Jyl saıyn elimizde 4,5-5 mln tonna qatty turmystyq qaldyq jınalady. Qazirgi ýaqytta jalpy kólemi 120 mln tonna qaldyq bar. Elimizde 3,5 myńnan astam qoqys polıgony bolsa, onyń 17,7% ǵana ekologııalyq jáne sanıtarlyq talaptarǵa saı. Polıgondardyń basym bóligi tolyp, qyzmet kórsetý merziminen ótip ketken», - dedi mınıstr Senatta «Turmystyq jáne ónerkásiptik qaldyqtardy jınaý jáne óńdeý» taqyrybyndaǵy Úkimet saǵatynda.

2019 jyldyń 9 aıynda qatty turmystyq qaldyqtardy joıý men qaıta óńdeý úlesi 13,2% quraǵan.

Sonymen birge, Aqmola (3%), Batys Qazaqstan (4%), Shyǵys Qazaqstan (5%) oblystary qoqys óńdeýde artta qalyp otyr. Tıisinshe, bul turǵyda Almaty oblysy (18%) men Shymkent (22%) kósh bastap tur.

«Qoqys máselesin udaıy baqylaýda ustaý úshin mınıstrlik «Qazaqstan Ǵarysh Sapary» ulttyq kompanııasymen birlesip, qoqys tastalatyn jerlerge ǵaryshtan zondtaý júrgizedi. 2018 jyldan beri Ǵaryshtyq baqylaý geoportaly jumys isteıdi. Spýtnık sýretteri arqyly 2019 jyly zańsyz qoqys jınalǵan 9 628 nysan anyqtaldy. Ázirge onyń 1 303 nysany (14%) joıyldy. Bul baǵyttaǵy jumystar jalǵasýda», - dedi Maǵzum Myrzaǵalıev.