Elimizde 200-den asa kolledj qurylys salasyna qajet kadrlardy daıarlaıdy
«Ashyq saǵat alańy» jobasy sheńberinde qurylys isteri jáne TKSh komıtetinde bıznes-qoǵamdastyq, sondaı-aq jergilikti atqarýshy organdar ókilderiniń qatysýymen onlaın formatta kezdesý ótti.
Dóńgelek ústel barysynda qatysýshylar qurylys salasynyń eńbek resýrstaryn qamtamasyz etý máselelerin talqylady.
Qurylys jáne TKSh isteri komıteti tóraǵasynyń orynbasary Baqytjan Júnisbekovtiń aıtýynsha, bıznes-qoǵamdastyq ótken jyldan beri kadr tapshylyǵy máselesin birneshe ret kóterip keledi.
«Kadr tapshylyǵy boıynsha problemalyq máselelerdi sheshý jáne pysyqtaý maqsatynda komıtet qurylys salasynda kadr daıarlaý máselesi boıynsha taldaý júrgizdi. Búgingi tańda elimizdiń barlyq óńirinde qurylys salasy úshin kadr daıarlaıtyn kolledjder bar. Bilim salasyndaǵy ýákiletti organdardan alynǵan aqparatqa súıensek, elimiz boıynsha tehnıkalyq jáne kásiptik bilim beretin 770 uıym bar. Onyń ishinde 202 kolledj qurylys salasy úshin kadr daıarlaıdy. Onda 21 myńnan astam stýdent bilim alady», – dep atap ótti B.Júnisbekov.
Aıta keterligi, komıtet Eńbek jáne halyqty áleýmettik qorǵaý mınıstrligi, Ǵylym jáne joǵary bilim mınıstrligi, Oqý-aǵartý mınıstrliginiń derekteri boıynsha kadr tapshylyǵy boıynsha taldaý júrgizgen.
Oǵan sáıkes memlekettik granttyń bólinetin jyl saıynǵy kólemi sáýletshi, barlyq baǵyttaǵy ınjener-qurylysshy, sondaı-aq orta býyn jáne jumysshy kásipter sııaqty mamandyqtar boıynsha kadrlarǵa degen qajettilikti tolyq kólemde qamtamasyz etýge múmkindik beredi.
Sondaı-aq Qurylys salýshylar qaýymdastyǵy men Qazaqstan qurylysshylar odaǵynyń oqytý baǵdarlamasyn qaıta qaraý jónindegi usynystary sátti iske asyp jatyr.
Atap aıtqanda, atalǵan sharalar oqý aıaqtalǵannan keıin jumyspen qamtý, sondaı-aq mektep túlekteri men jumyssyz jastar arasynda tıisti kásiptik baǵdarlaý sharalaryn qamtıdy.
Búgingi tańda qazaqstandyq kolledjderge akademııalyq derbestik berilgen.
Osylaısha, 400-ge jýyq bilim baǵdarlamasy qaıta qaralyp, jumys berýshilerdi bilim berý protsesine tartý úshin dýaldy oqytý formaty sátti júzege asyp jatyr.
Bul rette dýaldy oqytý barysynda stýdenttiń tájirıbeden ótý merzimi eńbek ótiline qosa esepteledi.
Sondaı-aq kásiporyndardy yntalandyrý úshin óndiristegi tálimgerlerge eńbekaqy tólenetinin atap ótken jón.
Búginde atalǵan oqytý formaty 109 otandyq kolledjde engizilgen.
Jalpy qurylys mamandyqtary boıynsha dýaldy oqytýmen 6 myńǵa jýyq stýdent qamtylǵan.
Foto: gov.kz