Elimizde 18 jyldan beri álemdik jáne dástúrli din kóshbasshylarynyń sezi ótip keledi - Senat spıkeri
Máýlen Áshimbaev sapar aıasynda qazaqstandyq depýtattar men Parlamentaralyq Odaq arasyndaǵy yntymaqtastyqty odan ári nyǵaıtý baǵyttaryn talqylaý mańyzdy ekenin atap ótti.
Palata tóraǵasy elimiz Prezıdenti Qasym-Jomart Toqaevtyń jańǵyrtý jónindegi baǵdaryn iske asyrýǵa, onyń ishinde Qazaqstannyń saıası júıesin odan ári demokratııalandyrýǵa baǵyttalǵan zań shyǵarý jumystary týraly áńgimeledi.
Máýlen Áshimbaev Memleket basshysy bıylǵy jyldyń 8 maýsymynda qol qoıǵan «Qazaqstan Respýblıkasynyń Adam quqyqtary salasyndaǵy odan arǵy sharalary týraly» Jarlyqqa da toqtaldy.
«Jarlyqty iske asyrý maqsatynda Birinshi kezektegi sharalar jospary qabyldandy. Zań jobalaryn, onyń ishinde áıelderdi kemsitýshiliktiń jolyn kesý, adam saýdasynyń aldyn alý jáne oǵan qarsy kúres salasynda tutastaı toptama ázirleý kózdelip otyr. Múmkindigi shekteýli jandardy jumysqa ornalastyrý máselesi boıynsha, sondaı azamattardyń múmkindikterin keńeıtý jáne áleýmettendirýge baǵyttalǵan zań jobasy ázirlenedi», - dedi Palata tóraǵasy.
Máýlen Áshimbaev áńgime barysynda elimizdiń etnosaralyq jáne konfessııaaralyq kelisimdi qamtamasyz etý jónindegi tájirıbesine egjeı-tegjeıli toqtaldy.
«Álemde týyndap qalatyn etnosaralyq jáne konfessııaaralyq qaqtyǵystar aıasynda Qazaqstannyń erekshe tájirıbesi jahandyq deńgeıde suranysqa ıe bolyp otyr. Qazaqstannyń Tuńǵysh Prezıdenti Nursultan Nazarbaevtyń bastamasymen elimizde 18 jyl boıy Álemdik jáne dástúrli dinder kóshbasshylarynyń sezi ótip keledi. Forýmǵa tek din ókilderi ǵana emes, sondaı-aq álemdik aýqymdaǵy belgili saıası qaıratkerler de qatysady. Biz aldaǵy jyldyń qyrkúıeginde VII Sezdi ótkizemiz. Ol adamzattyń áleýmettik-rýhanı damýynda pandemııadan keıingi kezeńdegi álemdik jáne dástúrli dinder kóshbasshylarynyń róline arnalady», - dep atap ótti Máýlen Áshimbaev.
Taraptar sondaı-aq Ortalyq Azııadaǵy qaýipsizdik máseleleri men Aýǵanstandaǵy jaǵdaıdy qozǵady jáne koronavırýs pandemııasymen kúres barysyn talqylady.
Máýlen Áshimbaev osyǵan baılanysty Qazaqstan Prezıdenti Qasym-Jomart Toqaevtyń BUU aıasyndaǵy Bıologııalyq qaýipsizdik jónindegi halyqaralyq agenttik qurý týraly bastamasyna Parlamentaralyq Odaqtyń tóraǵasyn qoldaý bildirýge shaqyrdy.